بۇرىنعى قارجى پوليسياسىنىڭ قىزمەتكەرلەرى ەندى پوگونسىز بولادى - ق. قوجامجاروۆ

استانا. قازاقپارات - بۇرىنعى قارجى پوليسياسىنىڭ قىزمەتكەرلەرى ەندى پوگونسىز بولادى. بۇل ازاماتتار اراسىندا قىزمەتكەرلەرگە دەگەن سەنىمدى ارتتىرا تۇسپەك.

بۇل تۋرالى بۇگىن ماجىلىستە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى قايرات قوجامجاروۆ ءمالىم ەتتى.

 پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ جۇيەسىن ودان ءارى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.

«بۇگىنگى كۇنى حالىق تا، بيزنەس تە رەفورمالانىپ جاتقان قۇقىق قورعاۋ ورگاندارىنىڭ قۇرىلىمدارىن جاقسى قابىلداعانى ءبىز ءۇشىن اسا ماڭىزدى ماسەلە. ال وسى تۇرعىدان العاندا ءبىزدىڭ قىزمەتكەرلەرىمىزدە پوگوننىڭ بولماۋى ازاماتتار اراسىندا بەلگىلى ءبىر دەڭگەيدە سەنىمدىلىكتى ارتتىرادى دەپ ويلايمىن. سوندىقتان دا، ايتا كەتەرلىك باستى جاڭالىقتىڭ ءبىرى - ءبىزدىڭ قىزمەتكەرلەرىمىز ەندى پوگون تاقپايتىن بولادى، ارنايى ايىرىم بەلگىلەرى بار كيىم فورمالارىن كيمەيتىن بولادى» ، دەدى ق. قوجامجاروۆ.

 ونىڭ ايتۋىنشا، بۇعان قاراماستان بۇرىنعى قارجى پوليتسياسىنىڭ قىزمەتكەرلەرى ءۇشىن قولدانىستاعى الەۋمەتتىك، سالىقتىق جەڭىلدىكتەر ساقتالادى.

اۆتور: قانات مامەتقازى ۇلى