قازاقستان يراننىڭ يادرولىق باعدارلاماسى اياسىنداعى كەلىسسوزدەر ءۇشىن ءوز اۋماعىن ۇسىنۋعا ءارقاشان دايىن - ن. نازاربايەۆ
استانا. قازاقپارات - قازاقستان يراننىڭ يادرولىق باعدارلاماسى اياسىنداعى كەلىسسوزدەرگە ءوز اۋماعىن ۇسىنۋعا ءارقاشان دايىن. بۇگىن ەلىمىزگە مەملەكەتتىك ساپارمەن كەلگەن يران يسلام رەسپۋبليكاسىنىڭ پرەزيدەنتى حاسان رۋحانيمەن كەزدەسۋىنەن كەيىنگى باسپا ءسوز ءماسليحاتىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«يران مەن التىلىق ەلدەرى فورماتىنداعى يادرولىق ماسەلەلەر جونىندەگى كەلىسسوزدەر بارشامىزدىڭ باقىلاۋىندا تۇر. جالپى يراننىڭ يادرولىق باعدارلاماسى اياسىنداعى قازىرگى كەلىسسوزدەر بارىنشا ماڭىزدى. بۇنىڭ ناتيجەسىندە ءتيىمدى شەشىمدەر قابىلدانىپ، يران ەلىنەن سانكسيالار الىناتىن بولسا، وندا ەڭ الدىمەن يراننىڭ ءوز جاعدايى كوتەرىلەتىن بولادى»، - دەدى ن. نازاربايەۆ. ەلباسىنىڭ ايتۋىنا قاراعاندا، يران دۇنيەدەگى مۇناي قورىندا ءۇشىنشى ورىندا تۇرسا، گاز قورىنان الەمدە ءبىرىنشى ورىندا تۇر.
«وسىنىڭ بارلىعى يران حالقىنىڭ جاعدايىن كوتەرۋگە جاقسىلىق جاسايتىن ەدى، ەلدىڭ ەكونوميكاسى كوتەرىلىپ، ساۋدا-ساتتىق جانداناتىن ەدى. سوندىقتان، مەن يراننىڭ جۇرگىزىپ وتىرعان كەلىسسوزدەرىنە ۇلكەن تابىستار تىلەيمىن. بۇعان قاي ۋاقىتتا دا اتسالىسۋعا، قازاقستان كەلىسسوزدەر ءۇشىن ءوز اۋماعىن ۇسىنۋعا ءارقاشان دايىن»، - دەدى مەملەكەت باسشىسى.
ەسكە سالا كەتەيىك، جوعارى دەڭگەيدەگى كەلىسسوزدەر بارىسىندا قازاقستان- يران ءوزارا ىقپالداستىعىن بۇدان ءارى دامىتۋ مەن نىعايتۋدىڭ نەگىزگى جولدارى مەن تەتىكتەرى ناقتىلاندى.
اۆتور: قانات مامەتقازى ۇلى
