قازاقستان يراندى الەمدەگى ماڭىزدى ارىپتەستەرىنىڭ ءبىرى، تاتۋ كورشىسى رەتىندە قاراستىرادى - ەلباسى

بۇگىن يران يسلام رەسپۋبليكاسىنىڭ پرەزيدەنتى حاسان رۋحانيدىڭ ەلىمىزگە مەملەكەتتىك ساپارى اياسىندا اقوردادا ءوتىپ جاتقان كەڭەيتىلگەن قۇرامداعى كەزدەسۋ بارىسىندا ق ر پرەزيدەنتى ن. نازاربايەۆ وسىلاي مالىمدەدى.

ەڭ الدىمەن ەلباسى مارتەبەلى مەيماننىڭ ەلىمىزگە كەلگەن قادامىنا قۇتتى بولسىن ايتىپ، ساپارىنا ساتتىلىك تىلەدى.

«بۇل ءبىز ءۇشىن اسا ماڭىزدى وقيعا. وزىڭىزبەن بىرگە وسىنداي كەڭ اۋقىمدى دەلەگاتسيانى ەرتىپ كەلدىڭىز. بۇل بىزگە دەگەن ءسىزدىڭ كوڭىلىڭىز، بۇعان ريزاشىلىق بىلدىرەمىز. قازاقستان يران يسلام رەسپۋبليكاسىن ءوزىنىڭ الەمدەگى ماڭىزدى ارىپتەستەرىنىڭ ءبىرى، كاسپي جاعالاۋىنداعى تاتۋ كورشىسى رەتىندە قاراستىرادى»، - دەدى ەلباسى.

سونىمەن قاتار پرەزيدەنت يران ەلىنىڭ الدىندا تۇرعان ۇلكەن پروبلەما - يادرولىق باعدارلاما ماسەلەسىنىڭ جەڭىسپەن اياقتالاتىنىنا، كەلىسىمگە جەتەتىندىگىنە سەنىم ءبىلدىردى.

«بۇلار يران مەملەكەتىنىڭ ەكونوميكاسىنىڭ دامۋىنا، ءبىزدىڭ قارىم-قاتىناسىمىزعا زور سەپتىگىن تيگىزەتىنى بەلگىلى»، - دەدى ن. نازاربايەۆ.

ال يران يسلام رەسپۋبليكاسىنىڭ (ي ي ر) پرەزيدەنتى حاسان رۋحاني كەلىسسوزدەر بارىسىندا اۋقىمدى دەلەگاتسيانىڭ استاناعا بۇگىنگى ساپارى جانە وسى ساپار اياسىندا جەكە سەكتوردىڭ قاتىسۋى يران يسلام رەسپۋبليكاسىنىڭ قازاقستانمەن بارلىق سالادا قارىم- قاتىناستاردى دامىتۋعا بارىنشا نيەتتى ەكەنىن كورسەتىپ وتىرعانىن جەتكىزدى.

اۆتور: قانات مامەتقازى ۇلى