ەلباسى: قوستانايدا جايىلىمدىق القاپتاردىڭ جارتىسى عانا پايدالانىلادى

كەزدەسۋدىڭ الدىندا قازاقستان پرەزيدەنتى ءوڭىردىڭ اۋىل شارۋاشىلىعى القاپتارىن ارالاپ كوردى.

كەزدەسۋ بارىسىندا قوستاناي وبلىسىنىڭ اكىمى ن. ءسادۋاقاسوۆ ءوڭىردىڭ نەگىزگى الەۋمەتتىك- ەكونوميكالىق دامۋ قورىتىندىلارى مەن الداعى كەزەڭگە ارنالعان مىندەتتەر تۋرالى باياندادى. سونداي-اق ق ر اۋىل شارۋاشىلىعى ءمينيسترى ا. مامىتبەكوۆ قىسقاشا ەسەپ بەردى.

ءوز سوزىندە مەملەكەت باسشىسى قوستاناي وبلىسى استىق داقىلدارىن كوپ جينايتىنىن، ونىڭ كولەمى بۇكىل قازاقستان بويىنشا جينالاتىن استىقتىڭ 25 پايىزىن قۇرايتىنىن ايتتى.

نۇرسۇلتان نازاربايەۆ بۇل وبلىس ەلدەگى اۋىل شارۋاشىلىعى ونىمدەرىن وندىرەتىن جەتەكشى ءوڭىر سانالاتىنىن، سوڭعى 6 جىلدا ايماقتىڭ اگروونەركاسىپ كەشەنىنە ۇلكەن مەملەكەتتىك قولداۋ جاسالعانىن اتاپ ءوتتى.

بۇل رەتتە قازاقستان پرەزيدەنتى ءوڭىردىڭ وسى سالاسىنداعى جاعداي بارلىق جاعىنان قاناعاتتانارلىق ەمەس ەكەنىنە نازار اۋداردى. بۇل مال شارۋاشىلىعىن دامىتۋعا كەسىرىن تيگىزەتىن، استىقتىڭ ءبىر عانا ءتۇرىنىڭ ساقتالۋىنا دا قاتىستى. سونىمەن قاتار، ۇلكەن جايىلىمدىق القاپتار بولا تۇرا، ولار تۋرا ماقساتىندا جارتىلاي عانا پايدالانىلادى.

- وبلىستىڭ الەۋەتى ءىرى قارا مال سانىن بۇگىنگى 400 مىڭ باستان 1,5 ميلليونعا دەيىن جەتكىزۋگە مۇمكىندىك بەرەدى، - دەدى مەملەكەت باسشىسى.

نۇرسۇلتان نازاربايەۆ وبلىستا ىلعال ساقتاۋ تەحنولوگيالارىن ەنگىزۋ مەن ەگىستىكتى ءارتاراپتاندىرۋدان ءتيىستى ناتيجە بايقالمايتىنىن دا اتاپ ايتتى.

- وبلىستا ەگىننىڭ 83 پايىزىن استىق الىپ جاتىر، كوكونىس، كارتوپ ەگىستىگى وسىرىلمەگەن، ال مال ازىعى 15 مىڭ گەكتارعا قىسقارعان، - دەدى قازاقستان پرەزيدەنتى.

مەملەكەت باسشىسى قوستاناي وبلىسىنداعى وڭدەۋشى وندىرىستەردىڭ ونىممەن قامتىلۋ ماسەلەسى الاڭداۋشىلىق تۋدىراتىنىن ايتتى.

- ەت وڭدەيتىن زاۋىت سالدىق، ول %50، جۇمىس ىستەيدى، مەملەكەتتىڭ اقشاسى ءتيىمسىز جۇمسالدى، - دەدى مەملەكەت باسشىسى.

وسىعان بايلانىستى نۇرسۇلتان نازاربايەۆ جوبالاردى ءتيىمدى جۇزەگە اسىرۋ ءۇشىن قارجىلاندىرماس بۇرىن مۇقيات ەسەپ جۇرگىزىپ، نارىقتى جاقسىلاپ زەرتتەپ الۋ قاجەتتىگىن ايتتى.

قازاقستان پرەزيدەنتى ارقالىق قالاسىن دامىتۋعا كوڭىل ءبولۋ قاجەتتىگىنە، جاڭا تەمىرجولدىڭ اشىلۋىنا بايلانىستى ول ءۇشىن جاڭا مۇمكىندىكتەر مەن جۇمىس ورىندارى پايدا بولىپ جاتقانىنا توقتالىپ ءوتتى.

مەملەكەت باسشىسى وڭىردە اۋىل جاستارىن جۇمىسپەن قامتۋمەن اينالىسۋ قاجەتتىگىن ايتتى.

- ەگەر جاستار اۋىلدا قالىپ، جۇمىس ىستەگىسى كەلسە، ولارعا شارۋاشىلىقپەن اينالىسۋدى ۇيرەتۋ كەرەك، - دەدى قازاقستان پرەزيدەنتى.

سونىمەن قاتار، نۇرسۇلتان نازاربايەۆ دەنساۋلىق ساقتاۋ سالاسىنداعى تۇيتكىلدى ماسەلەلەردى - ءولىم دەڭگەيىنىڭ جوعارىلىعىن، وڭىردەگى وكپە اۋرۋىنىڭ كوپتىگىن، اۋىز سۋمەن جانە مەكتەپكە دەيىنگى بالالار مەكەمەلەرىمەن قامتاماسىز ەتۋ قاجەتتىگىن اتاپ ءوتتى.

قازاقستان پرەزيدەنتى اتالعان بارلىق ماسەلە بويىنشا جەدەل شارالار قابىلداۋ كەرەكتىگىنە نازار اۋداردى.

كەزدەسۋ سوڭىندا مەملەكەت باسشىسى قاتىسۋشىلارعا باق-بەرەكە جانە ەڭبەكتەرىنە تابىس تىلەدى.

ءوز كەزەگىندە وبلىستىڭ اگرارلىق كاسىپورىندارى وكىلدەرى نۇرسۇلتان نازاربايەۆقا اۋىل شارۋاشىلىعى ماسەلەلەرىنە ۇدايى كوڭىل ءبولىپ وتىراتىنى ءۇشىن العىستارىن ايتىپ، سالانى دامىتۋعا قاتىستى شارالار ۋاقتىلى قابىلداناتىنىن اتاپ ءوتتى.