قازاقستاننىڭ قاۋىپسىزدىگى ءۇشىن ورىن الۋى مۇمكىن سىن- قاتەرلەردى ەسكەرتۋدە بارلىق جۇمىستاردى اتقارۋ ماڭىزدى - ن. نازاربايەۆ
استانا. قازاقپارات - حالىقتىڭ ءال-اۋقاتى مەن قازاقستاننىڭ قاۋىپسىزدىگى ءۇشىن ورىن الۋى مۇمكىن سىن- قاتەرلەردى ەسكەرتۋدە بارلىق جۇمىستاردى اتقارۋ ماڭىزدى. بۇل تۋرالى بۇگىن 5- شاقىرىلعان ق ر پارلامەنتىنىڭ 4- سەسسياسىنىڭ اشىلۋىندا ءسوز سويلەگەن ەلباسى نۇرسۇلتان نازاربايەۆ ايتتى.
«پارلامەنتتىڭ جاڭا سەسسياسى كۇردەلى جاعدايدا باستالىپ وتىر. الەمدىك ەكونوميكاداعى بولجامسىزدىق ساقتالۋدا، گەوساياسي، ونىڭ ىشىندە ۋكرايناداعى وقيعالارعا وراي حالىقارالىق قارىم-قاتىناستار السىرەۋىمەن بايلانىستى تاۋەكەلدەر تەرەڭدەپ كەلەدى. الەمدىك ج ءى ءو- ءنىڭ جالپى 60 پايىزىن قۇرايتىن مەملەكەتتەر ءبىر-بىرىنە ساكسيالار قولدانۋدا»، - دەدى ەلباسى.
مەملەكەت باسشىسىنىڭ اتاپ وتۋىنشە، مۇنىڭ بارلىعى دا ورىن الىپ وتىرعان ەكونوميكالىق قارىم-قاتىناستار مەن الەمدىك تارتىپكە ايتارلىقتاي تۇزەتۋلەر ەنگىزۋگە تۇرتكى بولادى. سونىمەن قاتار ول قازاقستاننىڭ جانە ونىڭ سەرىكتەستەرىنىڭ ەكونوميكالىق ءوسىمىنىڭ تومەندەۋىنە اكەلەدى.
«سوندىقتان دا ەكونوميكا، حالىقتىڭ ءال-اۋقاتى، قازاقستاننىڭ قاۋىپسىزدىگى ءۇشىن ورىن الۋى مۇمكىن تەرىس سىن- قاتەرلەردىڭ الدىن الۋدا بارلىق جۇمىستاردى اتقارۋ ماڭىزدى. مۇنىمەن مەنىڭ تاپسىرمام بويىنشا ۇكىمەت اينالىسىپ جاتىر. بۇگىنگى تاڭدا قولداعى بار مۇمكىندىكتەردى ءتيىمدى پايدالانۋ ءۇشىن ۇكىمەت پەن پارلامەنتتىڭ بىرلەسكەن جۇمىسى قاجەت»، - دەدى ن. نازاربايەۆ.
اۆتور: مارلان جيەمباي
