قازاقستان ءۇشىن قاراجاتتى ەڭ الدىمەن عارىش سالاسىن دامىتۋعا قۇيعان ءلازىم - داريعا نازاربايەۆا
بۇگىن پارلامەنت ماجىلىسىندە وتكەن «قازاقستان رەسپۋبليكاسىنىڭ عارىش سالاسىن قۇرۋ بارىسى» اتتى تاقىرىپتاعى ۇكىمەت ساعاتىندا پالاتا ءتوراعاسىنىڭ ورىنباسارى داريعا نازاربايەۆا وسىلاي مالىمدەدى.
«البەتتە، بۇگىنگى تاڭدا قازاقستاننىڭ عارىش سالاسىندا پروبلەمالار دا، قاتەرلەر دە از ەمەس. وسال تۇستارى دا جەتەرلىك. دەگەنمەن، ءبىزدىڭ قازاقستاندىق عارىشتىق عىلىم سالاسىنا بار- جوعى 7 جىل عانا ەكەنىن، ياعني ۇلتتىق عارىش اگەنتتىگىنىڭ قۇرىلعانىنا 7 جىل تولعانىن ۇمىتپايىق. سوندىقتان دا، سالماقتى عىلىمي ەڭبەكتەر مەن ۇسىنىستار بولۋى ءۇشىن جاڭا بۋىندى عالىمداردىڭ جەتىلۋىنە دە ونداعان جىلدار ءوتۋى كەرەك تە ءتارىزدى. سوندا عانا ءبىزدىڭ عارىشتىق سالا الەمنىڭ جەتەكشى سالاسىنا اينالا الار ەدى، ال بۇعان دا العىشارتتار بارشىلىق» ، - دەدى داريعا نازاربايەۆا.
وسىعان وراي، ۆيسە- سپيكەر قازاقستان ءۇشىن قاراجاتتى ەڭ الدىمەن عارىش سالاسىن دامىتۋعا قۇيۋ كەرەكتىگىن ايتا كەلە، بۇگىنگى تاڭدا ينوۆاتسياعا دا، عىلىم سالاسىنا دا سالىناتىن قاراجاتتار دا از ەمەس ەكەنىن، دەگەنمەن ولاردىڭ ناتيجەلىلىگى ءتيىستى دەڭگەيدە ەمەستىگىن العا تارتتى.
«الايدا، ءتۇرلى باعىتتاعى عىلىمي ىزدەنىستەرگە جۇمسالعان ونداي قاراجاتتىڭ قانداي ناتيجە اكەلىپ جاتقانىن ەشكىم ناقتى ايتىپ بەرە المايدى. ەگەر يننوۆاتسيالىق، عىلىمي زەرتتەۋلەردى تولىعىمەن سارالاساق، ونىڭ ناتيجەسىن تالداپ، كەيىننەن رەسۋرستاردى ەڭ الدىمەن قاجەتتى تۇسقا قايتا باعىتتاساق، وندا بۇنىڭ تيىمدىلىگى دە ايتارلىقتاي جوعارى بولار ەدى. ارينە، عارىش سالاسى ءۇشىن قاراجات قاشاندا جەتكىلىكسىز. سوندىقتان دا، ءبىز بيۋدجەتتىك قاراجاتتاردى جۇمساۋدى تيىمدىلىككە باعىتتاپ، شىعىنداردى وڭتايلاندىرۋدى ۇسىنار ەدىك» ، - دەدى د. نازاربايەۆا.
اۆتور: قانات مامەتقازى ۇلى
