اكىم بولۋ ايەلدىڭ قولىنان كەلمەي مە؟
نازىكجاندىلاردىڭ اكىم كرەسلوسىندا وتىرعانداردىڭ ەڭ كوبى اقمولا وبلىسىندا كورىنەدى.
49 ايەل اۋدان اۋىلداعى اكىمنىڭ پورتفەلىن كوتەرىپ ءجۇر ەكەن. ودان كەيىنگى ورىندا الماتى وبلىسى بولسا، قوستاناي دا قالىسا قويمايدى. مۇندا 44 ايەل اۋىل اكىمى اتانىپ ءجۇر.
ال ايەل- اكىمى جوق ءوڭىر وڭتۇستىك قازاقستان وبلىسى بولىپ تۇر. مۇندا بىردە ءبىر ايەل اكىم بولىپ جۇرگەن جوق. ولارعا ازىرگە اكىمنىڭ ورىنباسارلىعىنان باسقا جاسىل جانباي تۇر.
ەڭ بيىك قىزمەتتىڭ قۇلاعىن ۇستاعان دەپ ءلاززات سماعۇلوۆانى اتاۋعا بولاتىن سياقتى. ول وبلىس اكىمى اپپاراتى باسشىسىنىڭ ورىنباسارى قىزمەتىن اتقارىپ ءجۇر. ودان كەيىن شىمكەنت قالاسى اكىمىنىڭ ورىنباسارى گۇلجان قۇرمانبەكوۆا، تولە ءبي اۋدانىنىڭ اكىمىنىڭ ورىنباسارى رابيعا بەيسەبايەۆا، ماقتارال اۋدانى اكىمىنىڭ ورىنباسارى التىن ەشەنقۇلوۆالاردان باسقا اكىمدىكتىڭ اۋىلىنا قونىس تەپكەندەر از...
كەزىندە سارى اعاش اۋدانىنىڭ اكىمى بولعان ورازكۇل اسانعازيەۆامەن بىرگە اكىم اكىم-ايەلدەردىڭ كوشى استاناعا كوشىپ كەتكەندەي اسەر قالدىراتىنى بار. ورازكۇل اپامىز اكىم بولۋ ايەلدىڭ دە قولىنان كەلەتىنىن دالەلدەپ بەرگەن بولاتىن. سارى اعاش اۋدانىن باسقارىپ جۇرگەن ۋاقىتىندا ورازكۇل اپايىمىزدىڭ حالىق ءۇشىن تىندىرعان تىرلىگىن جۇرت ءالى كۇنگە دەيىن اڭىز قىلىپ ايتادى.
ءبىر عانا مىسال، اۋداندى ارالاپ جۇرگەنىندە ءبىر شارۋاشىلىقتاعى مالدىڭ جايىن بىلمەك بولىپ بۇرىلادى. بارسا قورانىڭ الدى تولعان مالاق، باتپاقتان اياق الىپ جۇرگىسىز دەيدى. اكىمنىڭ قاسىندا باسشىسى بار، قوسشىسى بار وڭكەي ەركەك قوراعا قالاي كىرەرلەرىن بىلمەي اڭتارىلىپ قالسا كەرەك. (بۇگىنگىدەي ەمەس، اكىم كەلە جاتىر دەسە كوشەگە دەيىن سىپىرىپ قوياتىن ۋاقىت ەمەس ول كەزدە) . سويتسە ورازكۇل اپامىز الگى باتپاققا اياعىن مالىپ، ءوزى باستاپ مالاققا مالشىنىپ قوراعا باستاپ كىرىپ كەتەدى. ارتىندا قالعاندارى دا امالسىز ەرۋگە تۋرا كەلىپتى.. .
اۋداننىڭ الەۋەتىن كوتەرۋگە بەل شەشىپ، بىلەك سىبانىپ كىرىسكەن اپامىزدىڭ ەڭبەگىنىڭ وتەلگەن جايى بار. تۇيىنشەك بولىپ تۇيىلگەن ءبىراز ماسەلەنىڭ ءتۇيىنىن تارقاتۋعا سەپتىگى ءتيدى. تالاي يگى باستامالاردىڭ باستاۋ الۋىنا مۇرىندىق بولدى. ايتەۋىر اكىم اپامىزدىڭ بيىك مىنبەرلەردەن باتىل ايتقان پىكىرلەرىنىڭ جەردە قالعان جەرى جوق. سودان باعى جانىپ استاناعا اۋىسىپ كەتكەلى بەرى اكىم ايەلدەردىڭ كوشى دە قاڭتارىلىپ قالعانداي.
كەزىندە سارى اعاش اۋدانىن باسقارىپ جۇرگەنىندە اتاقتى كۋرورتقا دەمالۋعا كەلگەن شەنەۋنىكتەردى ەلدىڭ، جەردىڭ جاعدايىمەن تانىستىرا وتىرىپ، ءتۇيىنى تارقاتىلماعان ماسەلەلەردى شەشىپ العانىن جۇرت ايتادى بۇگىندە. ماسەلەن، ءبىر جولى كولىك ءمينيسترى بولعان بەكبولاتوۆ دەگەن كىسى كۋرورتقا كەلىپ دەمالادى. اسانعازيەۆا مينيسترگە امالىن تاۋىپ سارى اعاشتىڭ جىرتىق جاماۋ جولدارىن كورسەتەدى. تاشكەنتكە ءتيىپ تۇرعان اۋداننىڭ ويدىم ويدىم جولدارىن كورىپ مينيستر دە ويلانسا كەرەك. ارتىنشا مينيسترلىك اۋدانعا قارجى ءبولىپ، شەكارادان شىعا بەرىستەگى 44 شاقىرىم جولدى جوندەپ بەرەدى.
تاعى ءبىر جولى ۋليانوۆ دەگەن بايلانىس ءمينيسترى سارى اعاش كۋرورتىندا دەمالادى. ء«سىز استاناداعى ۇيىڭىزگە تەلەفون شالىپ كورىڭىزشى؟ » دەپ ادەيى ءسوز اراسىندا ازىلدەي ايتادى. قانشا تەلەفون شالسا دا مينيستر ۇيىنە تۇسە الماپتى. اقىرى استاناعا بارعان سوڭ سارى اعاشتىڭ بايلانىس جۇيەسىنە ارنايى قارجى ءبولىپ، بۇكىل كوممۋنيكاتسيانى جوندەپ بەرگىزگەن ەكەن. مىنە، وسىلايشا قىزمەتىن جەكە باسىنا ەمەس، حالىقتىڭ جاعدايىنا ورايلاستىرىپ شەشە بىلگەن ورازكۇل اپامىزدىڭ تىندىرعان تىرلىگى كوپ...
ودان بەرى دە اكىمدىكتىڭ ەڭ بيىك كرەسلوسىنا وتىرعان وبلىس اكىمىنىڭ ورىنباسارلىعىنا دەيىن كوتەرىلگەن سۆەتلانا بۋرلاچەنكو ەدى. وبلىس كولەمىندەگى جيىنداردا بوي كورسەتىپ، ءتىلىپ-ءتىلىپ سويلەمەسە دە ءتاپ ءتاۋىر قىزمەت اتقاردى. اتىنا ءسوز كەلتىرگەن كەزى جوق...
ايتەۋىر بۇگىندە وبلىس اكىمىنىڭ ورىنباسارلىعىنا دەيىن كوتەرىلە الاتىن، اكىم بولا الاتىن ايەل انالارىمىز كوپ. ءبىراق نەگە ەكەنىن بىلمەيمىز ولارعا اتىنان ءتۇسىپ، ورنىن بوساتىپ بەرەتىن ءبىرى جوق سياقتى ەر ازاماتتارىمىزدىڭ.
ايتپەسە الەمدى بەسىك ەتىپ تەربەتىپ وتىرعان ايەل انالاردىڭ قولىنان ەل باسقارۋ كەلمەيدى دەسەك ەشكىم سەنبەس.. .
اۆتور: گۇلبانۋ ەسىموۆا
«الاش ايناسى»
