پارسىلاردىڭ سوڭعى پاتشاسىنىڭ ۇلى: يران رەجيمىن قۇلاتۋ كەرەك

استانا. KAZINFORM - يزرايل وتكەن جۇمادا باستاعان يرانعا قارسى اسكەري وپەراتسياسىن ودان ءارى كۇشەيتتى. يزرايل يراننىڭ 200 دەن استام نىسانىن بومبالادى.

تەگەران قارىمتا رەتىندە حايفا، تەل-اۆيۆ جانە قۇدىسقا درون اتتاندىرىپ، زىمىرانمەن اتقىلادى. ەكى ەلدىڭ دە قالالارى قيراپ، حالقى قىرىلىپ جاتىر. جاعداي وڭاي ەمەس. كەيىنگى اقپارات بويىنشا، قارۋلى قاقتىعىس سالدارىنان يراندا 224، ال يزرايلدە 24 ادام قازا تاپتى.

يزرايل قاقتىعىس باستاعان 4 كۇننەن بەرى يران اۋماعىنداعى 200 دەن استام نىساندى بومبالاپ ۇلگەردى. بومبالار ۇكىمەتتىك، اسكەري، ونەركاسىپتىك جانە عىلىمي-تەحنيكالىق ورىنداردى تالقانداعان.

ماسۋد پەزەشكيان، يران پرەزيدەنتى:

- يزرايل توقتاۋ دەگەندى بىلمەيدى. ولار قالاعان جەرىنە باسىپ كىرەدى. ءبىز باسقىنشىلىققا قارسى اياۋسىز سوققى بەرەمىز. جازىقسىزدان جازىقسىز بوسقا كوپ ادام قىرىلادى.

يزرايل تەك قانا اسكەري نەمەسە عىلىمي نىسانداردى عانا ەمەس، ۇيلەردى دە بومبالاپ جاتىر. اۋە سوققىلارىنان كەلگەن شىعىن ءالى ەسەپتەلگەن جوق. كادرلارعا قاراساق، شابۋىل سالدارى اۋىر ءارى الاپات. كەيبىر عيماراتتار تولىعىمەن جەرمەن-جەكسەن بولعان. تەگەران تۇرعىندارى جاڭا شابۋىلدار بولادى دەگەن ۇرەيمەن ۇيلەرىن تاستاپ، ەل استاناسىنان جاپپاي كەتىپ جاتىر. كوبى ەلدىڭ تەرىسكەيىن بەتكە العان. حالىق ازىق-تۇلىك پەن ءبىرىنشى قاجەتتىلىكتەگى زاتتاردى تالاپ اكەتىپ جاتىر. جانارماي بەكەتتەرىندە ۇزىن-سونار كەزەك.

پارسىلاردىڭ سوڭعى شاحى - موحاممەد رەزا پەحۆەليدىڭ ۇلى كير رەزا يران حالقىنا «توڭكەرىس جاساۋ كەرەك» دەگەن ۇندەۋ تاستادى.

كير رەزا پەحليەۆي، يراننىڭ سوڭعى شاحىنىڭ ۇلى:

- ۇرىمتال ءسات تۋدى. قازىرگى ناۋبەتتىڭ بىردەن ءبىر سەبەبى يران رەجيمى. ازاماتتار وعان قارسى جاپپاي باس كوتەرۋى كەرەك. ءۇمىت ساۋلەسى جاندى، جاڭا قۋات پايدا بولدى. يراندى ەركىن الەمگە الىپ شىعۋ قاجەت. قازىر رەجيم قاتتى السىرەپ تۇر. توڭكەرىپ تاستاۋ كەرەك. ءبارى ءالي حامەنەيدىڭ كەسىرىنەن بولىپ جاتىر. مىنا سوعىس يران حالقىنىڭ ەمەس، ءالي حامەنەيدىڭ جەكە سوعىسى. ەركىندىك پەن دەموكراتياعا قول جەتكىزۋ كەرەك.

بۇل بەينەجازبانى «رەيتەر» اگەنتتىگى تاراتتى. ءبىراق يران شاحىنىڭ ۇلى قاي ەلدە سويلەپ تۇرعانى كورسەتىلمەگەن. دەرەككوزدەر بويىنشا ول نەگىزىنەن ا ق ش- تا تۇرادى. سۇحباتتى بريتانيالىق «بي-بي-سي» تەلەارناسىنىڭ جۋرناليسى لاۋرا كۋەنسبەرگ العان.

ساراپشىلار «پەحليەۆي شاحتىڭ تۇسىندا يران يزرايلدىڭ وداقتاسى بولعان ەدى» دەيدى. ادەتتە ەفيردەن كورىنبەيتىن شاحتىڭ ۇلى بريتانيالىق تەلەارنانىڭ ەكرانىنان اياق استىنان قالاي اتىپ شىقتى؟!.. ءدال وسى تۇستا يزرايل پرەمەر- ءمينيسترى دە مالىمدەمە جاسادى.

بينيامين نەتانياحۋ، يزرايل پرەمەر-ءمينيسترى:

- ا ق ش-پەن كەلىسسوز بولىپ جاتقاندا يراننىڭ رۋحاني كوسەمى اياتوللا حامەنەي كۇندە يزرايل جويىلسىن دەۋمەن بولدى. ءبىز اياتوللا حامەنەيدى ءولتىرۋىمىز كەرەك. ونى ءولتىرۋ قاقتىعىستى ۋشىقتىرمايدى، كەرىسىنشە اياقتايدى.

ساراپشىلار شاحتىڭ بالاسى مەن يزرايل پرەمەر-ءمينيسترىنىڭ ءبىر مەزەتتە جانە بىردەي مازمۇندا مالىمدەمە جاساعانىنا نازار اۋدارىپ وتىر. اياتوللا حامەنەيدىڭ كوزىن جويۋ كەرەك دەگەن نەتانياحۋدى دونالد ترامپ توقتاتقان.

24.kz