پارلامەنت جاڭا كونستيتۋتسيانى ىسكە اسىرۋ اياسىندا ءبىرقاتار ماڭىزدى زاڭ جوباسىن قارادى - قارين

بۇل تۋرالى مەملەكەتتىك كەڭەسشى ەرلان قارين الەۋمەتتىك جەلىدەگى پاراقشاسىندا جازدى.

- بۇگىن پارلامەنت پالاتالارىنىڭ بىرلەسكەن وتىرىسىندا دەپۋتاتتار ءبىرىنشى وقىلىمدا ءۇش زاڭ جوباسىن قارادى:

1. «قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭنىڭ جاڭا رەداكسياسى. بۇل زاڭ جوباسىندا 8 -تاراۋ مەن 43-باپ بار.

2. «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ جاڭا رەداكتسياسى. بۇل زاڭ جوباسىندا 12-تاراۋ مەن 60-باپ بار.

3. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا وزگەرىستەر مەن تولىقتىرۋلار ەنگىزۋ تۋرالى».

ۇسىنىلىپ وتىرعان وزگەرىستەردىڭ ماقساتى: قولدانىستاعى زاڭنامانى جاڭا كونستيتۋتسياعا بەيىمدەۋ، مەملەكەتتىك- ساياسي ۇلگىنى ينستيتۋتسيونالدىق تۇرعىدان جاڭارتۋ، ساياسي جاڭعىرۋ ۇدەرىسىن جالعاستىرۋ ءۇشىن جۇيەلى قۇقىقتىق نەگىز قالىپتاستىرۋ.

زاڭنامانى ۇيلەستىرۋ ۇدەرىسى جانە الداعى ۋاقىتتا وتەتىن قۇرىلتاي سايلاۋى كونستيتۋتسيالىق قاعيداتتار مەن ادىلەتتى قازاقستاننىڭ قۇندىلىقتارى نەگىزىندە ەلىمىزدى وركەندەتۋدىڭ جاڭا كەزەڭىنىڭ باستالعانىن ايعاقتايدى، - دەپ جازدى مەملەكەتتىك كەڭەسشى.

بۇعان دەيىن مەملەكەتتىك كەڭەسشى ەرلان قارين ەتنوسارالىق كەلىسىمدى نىعايتۋ ماسەلەلەرىنە ارنالعان رەسپۋبليكالىق جيىن وتكىزگەنىن جازعان ەدىك.