پاراليمپياداشىنىڭ نەدەن قايتىس بولعانى بەلگىلى بولدى

استانا. KAZINFORM - پاراتايەكۆوندوشى نىشان ءومىرالى ومىردەن وتكەنى بۇگىن حابارلاندى. بەلگىلى بولعانداي 1- قازاندا ساعات 22.15 شاماسىندا «باتىس ەۋروپا- باتىس قىتاي» رەسپۋبليكالىق ماڭىزى بار اۆتوجولىنىڭ 542-شاقىرىمىندا «نيسسان ماكسيما» ماركالى اۆتوكولىگىنىڭ جۇرگىزۋشىسى تۇركىستان وبلىسىنان تاراز قالاسى باعىتىندا كەلە جاتىپ، جولدىڭ ءجۇرىس بولىگىندە تۇيەمەن سوقتىعىسقان.

جامبىل وبلىستىق پوليتسيا قىزمەتىنىڭ دەرەگىنشە، اۆتوكولىكتىڭ سالونىندا جۇرگىزۋشى جالعىز بولعان. جول-كولىك وقيعاسى سالدارىنان ەر ادام تاراز قالاسىنداعى № 1 قالالىق اۋرۋحاناسىنا جەتكىزۋ بارىسىندا العان دەنە جاراقاتىنان قايتىس بولدى.

پوليتسيا قىزمەتكەرلەرى ق ر ق ك 345-بابى 3-بولىگى بويىنشا سوتقا دەيىنگى تەرگەپ-تەكسەرۋدى باستادى. اۆتوكولىك ارنايى ايىپ تۇراعىنا قويىلدى. جاۋاپكەرشىلىككە تارتۋ ءۇشىن مال يەسىن ىزدەۋ جۇمىستارى جۇرگىزىلىپ جاتقانىن حابارلادى.

ومىردەن وزعان نىشان ءومىرالى پاراتايەكۆوندودان ەكى دۇركىن الەم چەمپيونى (ماسكەۋ، 2014، لوندون، 2017)، ازيا چەمپيوناتىنىڭ كۇمىس جۇلدەگەرى (حوشيمين-2022)، پارا ازيا ويىندارىنىڭ كۇمىس جۇلدەگەرى (حاڭجوۋ-2023)، ەكى دۇركىن پاراليمپيادا ويىندارىنا قاتىسۋشىسى بولعان.

اۆتور

باقىتگۇل اباي قىزى