اقمولا وبلىسىندا ورتالىق ازياداعى ەڭ ۇلكەن سيىر ساۋاتىن ورتالىق ىسكە قوسىلدى
استانا. KAZINFORM - اقمولا وبلىسىنىڭ «رودينا ا ف» ج ش س كاسىپورنىندا قازاقستان مەن ورتالىق ازياداعى قۋاتتىلىعى جاعىنان ەڭ ۇلكەن ساۋىن كارۋسەلى ىسكە قوسىلدى. ءىس-شاراعا اۋىل شارۋاشىلىعى ۆيتسە-ءمينيسترى امانعالي بەردالين جانە وبلىس اكىمىنىڭ ورىنباسارى مۇرات بالپان قاتىستى.
بۇل جاڭاشىل جوبانىڭ قۋاتتىلىعى كۇنىنە 2000 سيىردى ساۋىپ، ءبىر ۋاقىتتا 80 باستى قامتۋعا مۇمكىندىك بەرەدى. كارۋسەلدە قولدانىلاتىن شۆەدتىك DeLaval برەندىمەن جابدىقتالعان روبوتتاندىرىلعان جۇيە ادامي فاكتوردى ازايتىپ، ساۋۋ پروتسەسىن اۆتوماتتاندىرىلعان تۇردە جۇرگىزەدى. بۇل تەحنولوگيا سيىرلاردىڭ دەنساۋلىعىن باقىلاپ، ءسۇت ساپاسىن تۇراقتى تۇردە باقىلاۋعا مۇمكىندىك بەرەدى.
- ءبىزدىڭ جاڭاشىل جوبامىزدىڭ باستى ەرەكشەلىگى - بۇل تەك اينالىپ تۇراتىن كارۋسەل ەمەس، ول جان-جاقتى تالداۋ جۇرگىزە الاتىن، ءاربىر سيىردى باقىلاپ، ونىڭ دەنساۋلىعى مەن ءسۇت ساپاسىن انىقتايتىن جۇيە. ءبىز بۇل جوبانى جاڭارتۋ قاجەتتىلىگىنەن جۇزەگە اسىردىق. العاشقى ساۋىن كارۋسەلدى 17 -جىل بۇرىن ورناتقان بولاتىنبىز. سول ۋاقىتتان بەرى تەحنولوگيالار ايتارلىقتاي وزگەردى، - دەدى «رودينا ا ف» ج ش س باسشىسى يۆان اداموۆيچ ساۋەر.
جاڭا ساۋىن كارۋسەلى جۇيەسىنىڭ ىسكە قوسىلۋى ءسۇت ءوندىرىسىنىڭ كولەمىن ارتتىرۋعا مۇمكىندىك بەرەدى. بۇل جوباعا 2 ميلليارد 909 ميلليون تەڭگە كولەمىندە ينۆەستيتسيا تارتىلىپ، 38 جاڭا جۇمىس ورنى اشىلدى. جاڭا جۇمىس ورىندارىنىڭ ورتاشا ايلىق جالاقىسى 450000 تەڭگەنى قۇرايدى. جوبا اياسىندا ءسۇت ءوندىرىسى جىلىنا 40 مىڭ تونناعا دەيىن ۇلعايادى، بۇل ەڭبەك ونىمدىلىگىنىڭ 1,5 ەسەگە ارتاتىنىن بىلدىرەدى.
جاڭا ءسۇت-تاۋارلى فەرمانىڭ تەحنولوگيالىق جابدىقتارى سيىرلاردىڭ تۇياقتارىن اۆتوماتتى تۇردە وڭدەيتىن ۆاننالار، دەنساۋلىق جاعدايىن باقىلايتىن كامەرالار، ءسۇت ساپاسىن انىقتايتىن داتچيكتەر مەن ءسۇتتى ساقتايتىن ارنايى رەزەرۆۋارلارمەن جابدىقتالعان. بۇدان باسقا، ءسۇتتى سالقىنداتۋ جانە سۋ، جىلۋدى قايتا قالپىنا كەلتىرۋ جۇيەلەرى ورناتىلعان. بۇل بارلىعى ءسۇت ءوندىرىسىنىڭ تيىمدىلىگىن ارتتىرۋعا، جۇمىسشىلاردىڭ ەڭبەك جاعدايلارىن جاقسارتۋعا جانە ەكولوگيالىق تازا ءونىم الۋعا مۇمكىندىك بەرەدى.
ايتا كەتۋ كەرەك، كەشەننىڭ ىسكە قوسىلۋى - مەملەكەت باسشىسىنىڭ وڭدەلگەن اۋىل شارۋاشىلىعى ونىمدەرىنىڭ ۇلەسىن %70- عا دەيىن ارتتىرۋ جونىندەگى تاپسىرماسىن جۇزەگە اسىرۋداعى ماڭىزدى قادام.
- ءبىزدىڭ الدىمىزدا ءسۇت ونىمدەرىن ەلورداعا جەتكىزۋدى %50- عا دەيىن ارتتىرۋ مىندەتى تۇر. بۇل ءۇشىن وڭىردە جاڭا وندىرىستەر قۇرىلىپ، قولدانىستاعىلارى كەڭەيتىلۋدە. ينۆەستيتسيالىق جوبالاردى جەڭىلدەتىلگەن نەسيەلەۋ باعدارلاماسى ءتيىمدى قولداۋ قۇرالىنا اينالدى، دەپ اتاپ ءوتتى مۇرات بالپان.
بۇل جوبا وڭىردەگى اۋىل شارۋاشىلىعى ءوندىرىسىن جاڭا دەڭگەيگە كوتەرىپ، جۇمىس ورىندارىن قۇرۋ، ءسۇت ونىمدەرىن كوبەيتۋ ارقىلى ەكونوميكانىڭ دامۋىنا ءوز ۇلەسىن قوساتىن ماڭىزدى باستاما بولىپ تابىلادى.
