اقمولا وبلىسىندا ەر ادام تراكتوردىڭ استىنا ءتۇسىپ، قازا تاپتى
استانا. KAZINFORM - پوليتسەيلەر جولاۋشىلاردى ارنايى قاراستىرىلماعان ورىنداردا تاسىمالداۋعا بولمايتىنىن تاعى ءبىر مارتە ەسكەرتتى، دەپ حابارلايدى Kazinform ءتىلشىسى.
اقمولا وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قايعىلى جول- كولىك وقيعاسى 6 -ماۋسىم كۇنى ساعات 13:30 شاماسىندا دەرجاۆينسك قالاسىنان ەكى شاقىرىم قاشىقتىقتاعى دالالى جەردەگى جولدا Lunking ماركالى دوڭعالاقتى تيەگىش تراكتوردىڭ قاتىسۋىمەن بولعان.
— الدىن الا مالىمەت بويىنشا، كولىك كابيناسىندا ءبىر عانا ورىن قاراستىرىلعانىنا قاراماستان، جولاۋشى فيلتر كاسسەتالارىنىڭ ۇستىنە وتىرعان. قوزعالىس كەزىندە ول تەپە- تەڭدىگىن ساقتاي الماي، جولعا قۇلاپ، تراكتوردىڭ ارتقى دوڭگەلەگىنىڭ استىنا قالعان. ەر ادام وقيعا ورنىندا العان جاراقاتىنان كوز جۇمدى، - دەپ حابارلادى ۆەدومستۆودان.
پوليتسەيلەردىڭ مالىمەتىنشە، تراكتور جۇرگىزۋشىسى وقيعا كەزىندە ماس بولماعان. اتالعان فاكتى بويىنشا ق ر ق ك 345-بابى 3-بولىگى بويىنشا (كولىك قۇرالدارىن جۇرگىزۋشى ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى، ابايسىزدا ادام ولىمىنە اكەپ سوققان ارەكەت) سوتقا دەيىنگى تەرگەۋ باستالدى.
— تراكتور ارنايى تۇراققا قويىلدى، تەرگەۋ امالدارى جۇرگىزىلىپ جاتىر، - دەپ تولىقتىردى ۆەدومستۆو.
قۇقىق قورعاۋ ورگاندارى جۇمىس بەرۋشىلەر مەن ارنايى تەحنيكا يەلەرىنە قاۋىپسىزدىك تەحنيكاسى بويىنشا نۇسقاۋلىقتاردى تۇراقتى تۇردە وتكىزىپ، تەحنيكانى پايدالانۋ ەرەجەلەرىنىڭ ساقتالۋىن باقىلاۋ قاجەتتىگىن ەسكە سالدى.
وسىعان دەيىن ءساۋىر ايىندا ەسىل-ارقالىق وتكەلىندە پويىزبەن سوقتىعىسقان تراكتورشى قازا بولعانىن جازعانبىز.
