انتيكور يندۋستريالاندىرۋ باعدارلاماسى ارقىلى اشىلعان كاسىپورىنداردى تەكسەرە مە
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى Kazinform ساۋالىنا جولداعان جاۋاپتا «ۇدەمەلى يندۋستريالىق- يننوۆاتسيالىق دامۋ باعدارلاماسى» دەپ اتالعان بەسجىلدىقتار ناتيجەسىندە اشىلعان زاۋىتتاردىڭ جۇمىسىن تەكسەرمەگەنىن ءمالىم ەتتى.
ماسەلە قايدان شىقتى؟
ۇكىمەتتىڭ رەسمي مالىمەتىنە سەنسەك، 2010-2019 -جىلداردى قامتىعان يندۋستريالاندىرۋ باعدارلاماسىنىڭ ارقاسىندا ەلىمىزدە 1250 دەن استام جاڭا كاسىپورىن مەن 300 مىڭعا جۋىق جۇمىس ورنى قۇرىلعان. 100 گە جۋىق ەل قازاقستاندىق ونىمدەردى تۇتىنۋشىعا اينالعان. جۇك جانە جەڭىل اۆتوموبيل، ەلەكتروۆوز جانە ترانسفورماتور، جۇك جانە جولاۋشىلار ۆاگونى، رەنتگەن جابدىعى، جارىق-ديودتى شام، تيتان بۇيىمدار، ءدارى-دارمەك، بۋ تۋربينالارىمەن مىس رادياتورلار، باتارەيا سياقتى 500 جاڭا ءونىمنىڭ ءوندىرىسى جولعا قويىلعان.
ال ب ا ق-تا، الەۋمەتتىك جەلىدە وسى باعدارلاما اياسىندا سالىنعان زاۋىتتاردىڭ اشىلماي جاتىپ جابىلىپ قالعانى، 1-2 جىل عانا ىستەپ، كەيىن رەسەي مەن قىتاي، وزبەكستان كاسىپورىندارىمەن باسەكەدە كۇيرەي جەڭىلگەنى تۋرالى دەرەك كوپ. مىسالى، ءماجىلىس دەپۋتاتى قايرات بالابييەۆتىڭ مالىمەتى بويىنشا جىلىنا 67 مىڭ پلانشەت، 40 مىڭ كومپيۋتەر، 43 مىڭ مونيتور شىعارادى دەگەن «Caspiy Electronic» زاۋىتى جۇمىسىن توقتاتقان. جىلىنا 40 مىڭداي كولىك قۇراستىرادى دەگەن «تۇلپار» اۆتوكولىك زاۋىتى، «قازتەحماش» زاۋىتى، جىلىنا 100 مىڭ توننا مىرىش وندىرەدى دەگەن بالقاش مىرىش زاۋىتى، «كازسات-1» جەرسەرىگى، شىمكەنتتەگى 19,3 ميلليون دوللارعا سالىنعان «يۋتەكس» ماقتا وڭدەۋ زاۋىتى، 88,6 ميلليون دوللار جۇمسالعان «بيوحيم» كاسىپورنى اشىلا سالىپ، جابىلىپ قالعان.
وسى كەمشىلىكتەرگە قاراماستان، سىبايلاس جەمقورلىققا قارسى ءىس-قيمىل اگەنتتىگى باعدارلامانىڭ قاراجاتى قانشالىقتى زاڭدى جولمەن يگەرىلگەنىن، اتىشۋلى جوبالار اقشا جىلىستاتۋدىڭ تەتىگى بولعان، بولماعانىن تەكسەرۋگە اسىعاتىن ءتۇرى جوق. مۇنى اگەنتتىك باسشىلىعى جۇمىس رەگلامەنتىمەن بايلانىستىرادى.
انتيكوردىڭ ۇستانىمى
سىبايلاس جەمقورلىققا قارسى ءىس- قيمىل اگەنتتىگى وسى 1250 دەن استام كاسىپورىننىڭ جۇمىسىنا تالداۋ جۇرگىزدى مە/جۇرگىزۋدى جوسپارلاپ وتىر ما؟
قانداي دا ءبىر تالداۋ جۇرگىزىلگەن بولسا، ناقتى قاي جوبالارعا بولىنگەن قاراجات ءوزىن اقتاماعانى انىقتالدى؟
وسى باعدارلامانىڭ باسى-قاسىندا بولعان اسەت يسەكەشەۆ، جەڭىس قاسىمبەك، رومان سكليار (سالا مينيسترلەرى) كارىم ءماسىموۆ، سەرىك احمەتوۆ، باقىتجان ساعىنتايەۆ (پرەمەر-مينيسترلەر) سياقتى سالا تىزگىنىن ۇستاعان ازاماتتاردان جاۋاپ الىندى ما؟ الىنسا، ناقتى قاي تۇلعا جانە قاي كەزدە، قانداي ستاتۋسپەن ىسكە تارتىلدى؟
بۇل سۇراقتارعا اگەنتتىك قىسقا جاۋاپ قايىردى.
- اگەنتتىك بۇعان دەيىن يندۋستريالاندىرۋ باعدارلاماسىن ىسكە اسىرۋ سالاسىندا سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلمەگەندىگىن جانە سۇراۋدا كورسەتىلگەن سۇراقتار بويىنشا قىلمىستىق ىستەر تىركەلمەگەندىگىن حابارلايدى، - دەپ جازىلعان جاۋاپتا.
ونداي سىرتقى تالداۋ جۇرگىزۋ تۋرالى شەشىمدى اگەنتتىك ءوز قۇزىرەتىنىڭ اياسىندا عانا قابىلداي المايتىنى ايتىلعان.
- سىرتقى تالداۋ جۇرگىزۋ ءۇشىن ۋاكىلەتتى ورگانداردىڭ ءبىرىنشى باسشىلارىنىڭ جانە سىرتقى تالداۋ وبەكتىسىنىڭ (ولار بولماعان جاعدايدا، ولاردىڭ مىندەتتەرىن اتقاراتىن نە ولاردىڭ لاۋازىمدارىن الماستىراتىن ادامداردىڭ) بىرلەسكەن شەشىمى نەگىز بولىپ سانالادى. بىرلەسكەن شەشىم سىبايلاس جەمقورلىققا قارسى مونيتورينگ ناتيجەلەرىنىڭ، سىبايلاس جەمقورلىق تاۋەكەلدەرىن سىرتقى تالداۋ وبەكتىسىنىڭ باستاماشىلىق ءوتىنىشى جانە ۋاكىلەتتى ورگاننىڭ ونى جۇرگىزۋ تۋرالى شەشىمىنىڭ، ق ر پرەزيدەنتىنىڭ، ق ر پرەمەر-ءمينيسترىنىڭ، ق ر پرەزيدەنتى اكىمشىلىگىنىڭ تاپسىرمالارى، ق ر پرەزيدەنتى جانىنداعى كونسۋلتاتيۆتىك-كەڭەسشى ورگانداردىڭ شەشىمدەرى مەن ۇسىنىمدارىنىڭ، الەۋمەتتانۋشىلىق زەرتتەۋ ناتيجەلەرى نەگىزىندە قابىلدانادى، - دەلىنگەن رەسمي مالىمەتتە.
اۆتور
ەسىمجان ناقتىباي
