انتيكور نۇرلان شابداردىڭ اتىنداعى قىمبات ۆيللا تۋرالى پىكىر ءبىلدىردى
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ۇلان سارقۇلوۆ ارىپتەسىنىڭ اتىنداعى قىمبات ۆيللا تۋرالى اقپاراتقا پىكىر ءبىلدىردى.
«ۆىحود ك موريۋ» تەلەگرام-ارناسى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى، ۇلتتىق قاۋىپسىزدىك كوميتەتىنىڭ بۇرىنعى ءتوراعاسى امانگەلدى شابداربايەۆتىڭ ۇلى نۇرلان شابداردىڭ اتىندا بولگارياداعى قىمبات ۆيللا بار ەكەنىن جازعان بولاتىن.
«ول جاريالانعان ماتەريالدى ءبىز دە كوردىك. ول ماسەلەمەن ءتيىستى بولىمشەمىز اينالىسىپ جاتىر. بىردەن ايتقىم كەلەدى، ەگەر مۇلىك دەكلاراتسيادا كورسەتىلگەن بولسا، ءتيىستى جولمەن تىركەلگەن بولسا زاڭ تالاپتارىنا باعىنۋ كەرەكتىگىن ءتۇسىنۋىمىز قاجەت. بىرەۋ بيزنەسپەن اينالىستى، بىرەۋ باسقا دەگەندەي. مەنشىك قۇقىعىن قۇرمەتتەۋىمىز كەرەك. بۇل ماسەلەنى زەرتتەيمىز»، - دەدى اگەنتتىك وكىلى.
«ۆيللانىڭ كىمگە تيەسىلى ەكەنىن انىقتادىڭىزدار ما؟»، - دەگەن سۇراققا ۇلان سارقۇلوۆ ناقتى جاۋاپ بەرمەدى.
«قازىر ءبىز كىم كىمنىڭ قايدا جۇمىس ىستەيتىنىنە، كىم ەكەنىنە قاراماستان قۇقىقتىق باعا بەرەمىز»، - دەدى ول.
اۆتور
ەسىمجان ناقتىباي
