انا ءتىلىڭدى ۇمىتساڭ، قازاق ەمەسسىڭ: 4 جاسىندا ا ق ش-قا كوشىپ كەتكەن قازاق بالاسى سۇحبات بەردى
استانا. قازاقپارات - 4 جاسىندا ا ق ش- قا كوشىپ كەتكەن قازاق بالاسى قازاقستانعا قايتا ورالدى. Jibek Joly ارناسىنداعى «Бүгін LIVE» باعدارلاماسىنا سۇحبات بەرگەن سايات نوكەربان تىكەلەي ەفيردە ەلگە دەگەن ساعىنىشىن جەتكىزدى.
- ا ق ش- قا 4 جاسىمدا كەتتىم. قازاقستاننان كەتكەنىمە 14 جىل ءوتتى. ەلىمدى ساعىندىم. مۇندا كەلە سالا تۋىسقاندارىممەن كەزدەستىم. ا ق ش- تا انام مەن ۇلكەن اعام قالدى. كوپ تۋىسىم «سايات بىزبەن بىرگە تۇرادى» دەپ تالاسىپتى. مەنى اۋەجايدا كوپ ادام كۇتىپ الدى. بۇل قازاقستانعا ءۇشىنشى رەت كەلۋىم. وتە قۋانىشتىمىن، - دەدى ا ق ش ازاماتى.
قازىر سايات تەحاس ۋنيۆەرسيتەتىندە قارجى ماماندىعى بويىنشا ءبىلىم الىپ جاتىر. سونىمەن قاتار بانكتە جۇمىس ىستەيدى. ءۇش اپتا بۇرىن الەۋمەتتىك جەلىدە پاراقشا جۇرگىزۋدى باستاعان. قىسقا ۋاقىت ىشىندە ونىڭ كونتەنتى 180 مىڭنان استام تىركەلۋشى جيناپتى.
- مەن قازىرگى ۋاقىتتا وستيندەگى تەحاس ۋنيۆەرسيتەتىندە «قارجى» ماماندىعىندا وقيمىن. بانكتە جۇمىس ىستەيمىن. پاراقشامدى ءۇش اپتا بۇرىن جۇرگىزە باستادىم. ءۇش اپتا ىشىندە 180 مىڭ تىركەلۋشى جينالدى. مەنىڭ كونتەنتىم شەتەلدىكتەرگە، امەريكالىقتارعا قىزىق. ولار ورتالىق ازيا تۋرالى بىلگىسى كەلەدى. ءبىزدىڭ ءومىرىمىز، مادەنيەتىمىز ولار ءۇشىن ەرەكشە. قازاقستاندا مەترودا، اۆتوبۋستا ادامدارمەن وڭاي سويلەسىپ كەتۋگە بولادى. ال ا ق ش- تا ونداي ەمەس. بىزدە كوپ نارسە باسقاشا. ارحيتەكتۋرا دا، مادەنيەت تە. ءبىراق مۋزەيلەرىمىز ۇقساس. مەن كوپ مۋزەيگە باردىم. عىلىم مەن تاريح تاقىرىپتارى بويىنشا وتە جاقىن، - دەيدى ول.
ستۋديا قوناعى اعىلشىن ءتىلدى ورتادا جۇرگەنىمەن، قازاق ءتىلىن ۇمىتپاعان.
- مەن اناممەن قازاق تىلىندە سويلەسەمىن، امەريكالىق اكەممەن اعىلشىنشا. كىشكەنتاي كەزىمنەن انام «انا ءتىلىڭدى ۇمىتساڭ، سەن شىن قازاق ەمەسسىڭ» دەپ ايتاتىن. بۇل مەنىڭ ميىمدا قالىپ قويدى. قازىر دە قازاق ءتىلىمدى دامىتۋعا تىرىسامىن. تۋىستارىممەن WhatsApp ارقىلى سويلەسەمىز. ونداعى توپتىڭ اتاۋى دا «باۋىرلار» دەپ اتالادى، - دەيدى امەريكالىق ازامات.
قازاقستانعا ەكى جارىم اپتا بۇرىن عانا كەلگەن سايات ەڭ اۋەلى اناسى دۇنيەگە كەلگەن كەگەن اۋىلىنا ات باسىن بۇرىپتى.
- مەن كەگەن اۋىلىنا باردىم. ول - انامنىڭ بالالىق شاعى وتكەن اۋىل. سول جاقتا اتقا ءمىندىم، قۇرت جاسادىم، سيىر ساۋدىم. اۋىل ءومىرى قاتتى ۇنادى. الەمدەگى ادامدارعا كورسەتۋ ءۇشىن دۇرىستاپ كونتەنت ءتۇسىردىم، - دەيدى بلوگەر.
امەريكالىق قازاق بۇعان دەيىن انشىلىك، اكتەرلىكپەن اينالىسقان. ءتىپتى ءوزىنىڭ قازاق تىلىندە جارىق كورگەن ءانى دە بار. ساياتتىڭ ايتۋىنشا، شەتەلدەگى اۋديتورياسى ونىڭ قازاق ەكەنىن بىلگەندە ايرىقشا قىزىعۋشىلىق ءبىلدىرىپتى.
- بۇرىن مەن ءانشى، اكتەر بولعانمىن. سول تۋرالى كونتەنت جاسايتىنمىن. اندەرىمدى ءوزىم جازامىن. اندەرىم ءومىرىم تۋرالى - اكەمنىڭ جوقتىعى، قىزدار تۋرالى. جاقىندا «قولىڭدى الشى» دەگەن العاشقى ءانىم شىقتى. بۇل ءاندى اناممەن بەشبارماق جاساپ جاتقاندا جازدىم. قازاق ەكەنىمدى ايتقان سوڭ، ادامدار سۇراق قويا باستادى. سول ءۇشىن مادەنيەتىمىز تۋرالى كونتەنت جاسايتىن بولدىم. ولار قازاقتار تۋرالى كوپ بىلمەيدى. گەننادي گولوۆكين، ديماش، شاۆكات سياقتى تانىمال ادامدار بار. ءبىراق جالپى مادەنيەتىمىز، ءومىرىمىز، تاريحىمىز تۋرالى تۇسىنىك جوق. مەن ءوزىمنىڭ ارعىن، ورتا ءجۇز ەكەنىمدى ايتتىم. اۋىلدان شىققانىمدى، قالاي ءومىر سۇرەتىنىمدى كورسەتتىم. تاۋ، كولدەردى دە تۇسىرىپ كورسەتتىم، - دەيدى سايات نوكەربان.
ول ا ق ش-تا ءجۇرىپ، ۇلتتىق تاعامداردى ساعىناتىنىن دا جاسىرمادى.
- BBC News-پەن سۇحباتتاسقاندا ولار مەنەن قانداي تاماقتى جاقسى كورەتىنىمدى سۇرادى. مەن ءبارىن جاقسى كورەم. ءمانتى، لاعمان، بەشبارماق ءبارىن جەگىم كەلەدى. ءبىر اپتا بۇرىن العاش رەت جىلقى ەتىن جەدىم. ءبىز جاقتا جىلقى جوق قوي. وتە ءدامدى بولدى، - دەيدى ستۋديا قوناعى.
قازاقتاردىڭ قوناقجايلىعى مەن ۇلتتىق تاربيەسى ساياتتىڭ دوستارىن دا تاڭعالدىرىپتى.
- دوستارىم ۇيگە كەلسە، انام پالاۋ، ءمانتى دايىنداپ بەرەدى. ولار «سەنىڭ اناڭدى قاتتى جاقسى كورەمىز» دەيدى. ا ق ش- تا ونداي ەمەس قوي. قازاقستاندا جاڭا ادامدار ۇيگە كەلسە، «شاي ءىش»، «تاماق جە» دەپ قارسى الادى. ءبىراق ا ق ش- تا ونداي ءداستۇر جوق. انام قاتتى تىرىسادى. كىشكەنتايىمنان ماعان قازاق ولەڭدەرىن وقىتاتىن. تاماق جاساپ جاتقاندا ءارقاشان قازاقشا ءان قوياتىن. مەن بالا كەزىمنەن «مۋزارت» توبىن جاقسى كورەمىن، - دەيدى ول.
اۆتور
ارۋجان ماحمۋت
