پاۆلوداردا قاتتى جەل سالدارىنان اۋىل مەكتەبى تۇگى قالماي جانىپ كەتتى
پاۆلودار. KAZINFORM - ەرتىس اۋدانىنىڭ بۇلانباي اۋىلىنداعى نەگىزگى مەكتەپ ورتەنىپ كەتتى. وقىس وقيعادان پەداگوگتار مەن وقۋشىلار زارداپ شەكپەگەن.
بۇگىن تاڭەرتەڭ توتەنشە جاعداي قىزمەتىنىڭ پۋلتىنە ەرتىس اۋدانى بۇلانباي اۋىلىندا ورنالاسقان نەگىزگى مەكتەپ عيماراتىندا ءورت شىققانى تۋرالى حابارلاما كەلىپ تۇسكەن. ءتىلسىز جاۋ ءبىلىم ۇياسىنا بەيىمدەلگەن بولەك تۇرعان ءبىر قاباتتى عيماراتتا تۇتانعان. بۇل نىسان 2010 -جىلى سالىنعان. الدىن الا بولجام بويىنشا ورتكە ەلەكتر سىمدارىنداعى قىسقا تۇيىقتالۋ سەبەپ بولعان.
- قاتتى جەلدەن عيمارات جانىندا تۇرعان ەلەكتر باعاناسىندا قىسقا تۇيىقتالۋ بولعان. ءورت سودان پايدا بولۋى مۇمكىن. ءورت شالعان اۋماق 153 شارشى مەتردى قۇرايدى. جانىپ كەتكەن مەكتەپتى قاراپ شىقتىق، عيماراتتى قايتا قالپىنا كەلتىرۋ مۇمكىن ەمەس. قۇربان بولعاندار مەن زارداپ شەككەندەر جوق، - دەپ حابارلادى پاۆلودار وبلىسى ءبىلىم بەرۋ باسقارماسىنان.
اتالعان مەكتەپتە 20 وقۋشى وقىپ كەلگەن. وقيعا ورنىندا ەرتىس اۋدانىنىڭ اكىمى مەن وڭىرلىك ءبىلىم بەرۋ باسقارماسىنىڭ باسشىسى بولىپ، بۇلانباي اۋىلى تۇرعىندارىمەن جيىن وتكىزگەن. وندا وقۋ ۇدەرىسىن ءارى قاراي ۇيىمداستىرۋ ماسەلەسى تالقىلانعان. اۋىل تۇرعىندارىنىڭ سۇراۋى بويىنشا بالالار ازىرشە شاعىن ورتالىققا ورنالاستىرىلادى.
وڭىرلىك توتەنشە جاعدايلار دەپارتامەنتى ءورتتىڭ شىعۋ سەبەپتەرى ءالى دە انىقتالىپ جاتقانىن مالىمدەدى. ولاردىڭ ەسەبىنشە، ءورتتىڭ اۋماعى 130 شارشى مەتردى قۇراعان.
ەسكە سالا كەتەيىك، س ق و- دا تۇرعىن ءۇي ورتەنىپ، وقيعا ورنىنان 2 ادامنىڭ دەنەسى تابىلعانىن جازعان ەدىك.
اۆتور
مۇرات اياعان
