پاۆلودار-استانا جولىنداعى كولىك اپاتى: جانساقتاۋ بولىمىندەگى بالانى اۋە كەمەسىمەن جەتكىزەدى
پاۆلودار. KAZINFORM - اقمولا وبلىسى ەرەيمەنتاۋ اۋداندىق اۋرۋحاناسىنىڭ جانساقتاۋ بولىمىندە جاتقان بالانى پاۆلودارعا اۋە كەمەسىمەن تاسىمالداۋ كوزدەلىپ وتىر.
استاناعا اپارار جولداعى كولىك اپاتىنان زارداپ شەككەن بالالاردىڭ بارلىعىن اۋرۋحانادان اتا-انالارى الىپ كەتكەن. تەك جانساقتاۋ بولىمشەسىندەگى جاس ءوسپىرىم عانا قالىپ وتىر.
- ەرەيمەنتاۋ اۋداندىق اۋرۋحاناسىنا جاتقىزىلىپ، دارىگەرلەردىڭ قاراۋىنا الىنعان بالالاردىڭ بارلىعى اتا-انالارىمەن ۇيلەرىنە جىبەرىلدى. ءۇش جاس ءوسپىرىمدى اتا-انانىڭ ءبىرى سەنىمحات بويىنشا الىپ كەتتى. اۋرۋحانانىڭ جانساقتاۋ بولىمشەسىندە زارداپ شەككەن بالا عانا قالدى. پاۆلودار وبلىسىنىڭ سانيتارلىق اۆياتسياسى بالانى جاقىن ارادا الىپ كەتەدى دەپ كۇتىلىپ وتىر، - دەپ حابارلادى اقمولا وبلىستىق دەنساۋلىق ساقتاۋ باسقارماسىنان.
ەسكە سالا كەتەيىك، پاۆلودار- استانا جولىندا بالالار مىنگەن اۆتوبۋس اۋدارىلىپ، جاتتىقتىرۋشى كوز جۇمدى. قازا تاپقان ەر ازامات 1990 -جىلى تۋعان. اۆتوبۋستى پاترۋلدىك كولىك سۇيەمەلدەمەگەنى بەلگىلى بولدى.
كەيىنىرەك جول اپاتىنان جەتى بالا زارداپ شەگىپ، ەرەيمەنتاۋ اۋداندىق اۋرۋحاناسىنا جەتكىزىلگەنىن، ولاردىڭ بىرەۋى جانساقتاۋ بولىمشەسىندە جاتقانىن جازعان بولاتىنبىز.
وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى پاۆلودار - استانا تاس جولىندا بالالار زارداپ شەككەن جول- كولىك وقيعاسىنا قاتىستى پىكىر ءبىلدىردى.
كوميتەتتىڭ مالىمەتىنشە، اپات كەزىندە 2011- 2012 -جىلدارى تۋعان بالالار كوماندالارى اراسىنداعى فۋتبول تۋرنيرىنە قاتىسۋ ءۇشىن استانا قالاسىنا بارا جاتقان جەكە فۋتبول مەكتەبىنىڭ تاربيەلەنۋشىلەرى بولعان.
- بالالاردىڭ اتا-انالارى جارىسقا قاتىسۋعا جانە كولىكپەن جۇرۋگە كەلىسىمىن WhatsApp مەسسەندجەرىندەگى ورتاق چاتتا جازباشا تۇردە بەرگەن. الايدا، جەكە فۋتبول مەكتەبىنىڭ وكىلدەرى بالالاردى تاسىمالداۋ تۋرالى جەرگىلىكتى جانە قۇقىق قورعاۋ ورگاندارىنا حابارلاماعان، - دەپ اتاپ ءوتتى ۆەدومستۆو.
سونىمەن قاتار كوميتەت بۇعان دەيىن بارلىق جەرگىلىكتى اتقارۋشى ورگانعا بالالاردى تاسىمالداۋدى ۇيىمداستىرۋ جونىندە ناقتى تالاپتارى بار نۇسقاۋلىقتار جولداعانىن، وندا ىلەسپە ادامداردىڭ جاۋاپكەرشىلىگى، كولىكتىڭ تەحنيكالىق جاعدايى جانە قاجەتتى قۇجاتتاردىڭ بولۋى مىندەتتى تۇردە كورسەتىلگەنىن ەسكە سالدى.
- قازىرگى ۋاقىتتا 16 بالانىڭ 15- ءى ۇيلەرىنە جەتكىزىلدى. ءبىر بالا بۇگىن سانيتارلىق اۆياتسيا ارقىلى پاۆلودار قالاسىنداعى وبلىستىق بالالار اۋرۋحاناسىنا جەتكىزىلىپ، ەمىن تۇرعىلىقتى جەرىندە جالعاستىرادى. پاۆلودار وبلىسىنداعى بالالار قۇقىقتارى جونىندەگى وڭىرلىك ۋاكىل زارداپ شەككەن بالانىڭ اناسىمەن بايلانىستا، - دەدى كوميتەت وكىلدەرى.
