التىن وردا تۋرالى تاريحي سەريالدىڭ اقتىق كادرلارى ءتۇسىرىلىپ جاتىر
استانا. KAZINFORM - التىن وردا تاريحي سەريالىن قولعا العان شىعارماشىلىق توپ ءتۇسىرۋ جۇمىستارىنىڭ اقتىق ساتىسىنا كىرىستى.
- The Golden Empire-دىڭ ءتۇسىرىلىم توبى ءوندىرىستىڭ اقتىق ساتىسىنا كىرىستى. باستى نازار فيلمنىڭ اقتىق كورىنىستەرىندە. بۇل ەپيزودتار سيۋجەت جەلىسىن ءبىر ىزگە ءتۇسىرىپ، وقيعالار شيەلەنىسىن اياعىنا دەيىن بوساڭسىتپاي، ناقتى ەكپىن بەرۋگە ءتيىس. جەتىسۋدا ءوتىپ جاتقان تۇسىرىلىمدەر توپتامانىڭ مازمۇندىق ىرعاعىن دا، كەسكىندىك ىرعاعىن دا كۇشەيتەتىن لوكاتسيالارعا باي. ءتۇسىرۋشى كوماندا نەگىزگى ديالوگتارمەن، كەيىپكەرلەردىڭ ىشكى تۇيسىگىن اشاتىن كورىنىستەرمەن وسى جەردە جۇمىس ىستەيدى. دەشتى-قىپشاق جەرى تۋىندىدا رۋلىق قۇرىلىمداردىڭ مۇددەسى مەن بيلىك تايتالاسىنىڭ، جەكە شەشىمدەردىڭ كەڭىستىگىنە اينالعان. نەگىزگى ەپيزودتاردىڭ بىرىندە كەيىپكەرگە كۇردەلى كەلىسسوزدەر جۇرگىزىپ قانا قويماي، ءوزىنىڭ قانداي ءتارتىپ ءۇشىن كۇرەسەتىنىن ايقىنداۋىنا تۋرا كەلەدى، - دەپ جازىلعان جوبانىڭ باسپا ءسوز-رەليزىندە.
- كورەرمەندى ءوزى ءومىر ءسۇرىپ كورمەگەن ءداۋىردىڭ دەمىمەن تىنىستاتۋ قاشان دا ۇلكەن سىناق. بۇل كورىنىستەر جاي عانا ەكشەن ەمەس، ادام تاڭداۋى تۋرالى حيكايالار. ول كورىنىستەر كادر سىرتىنداعى سوزبەن باياندالادى. سوڭعى كۇندەرى ءتۇسىرىلىپ جاتقان كورىنىستەر ناقتىلىق پەن ۇستامدىلىقتى، ىشكى جان دۇنيەدەگى شيەلەنىستەرمەن مۇقيات جۇمىس ىستەۋدى قاجەت ەتەدى. قازاقستاندىق اكتەرلەردىڭ ويىنى وسى تۇرعىدان نانىمدى ءارى ءداۋىردىڭ درامالىق كەلبەتىن ناقتى بەرە الادى، - دەيدى رەجيسسەر ەمرە ساحين.
9-مامىر كۇنى جەتىسۋ وبلىسىنداعى ءتۇسىرىلىم الاڭىنا مەملەكەتتىك كەڭەسشى ەرلان قارين بارىپ قايتقان. ول شىعارماشىل توپپەن ءتۇسىرىلىمنىڭ اقتىق ساتىسىنا دايىندىقتى پىسىقتاپ، تۋىندىعا ءتۇيىن بولاتىن كورىنىستەردىڭ نەگىزگى قىرلارىن، سونداي-اق، تۇسىرىلىمنەن كەيىنگى ۇيىمداستىرۋ جۇمىستارىن تالقىلادى.
The Golden Empire توپتاماسىن ءتۇسىرىپ جاتقان توپ قازاقستان اۋماعىندا 8 بىرەگەي لوكاتسيادا جۇمىس ىستەگەن. ونىڭ ىشىندە سۋىقتوبە، ەسكەلدى ءبي اۋىلدارى، بۇتاق جانە كىماسار شاتقالدارى، كيەلى تامعالى تاس مەكەنى مەن كوشپەلىلەر قالاشىعى بار.
اتالعان جوبانى Karga Seven Pictures حالىقارالىق كينو كومپانياسى قولعا العانىن ايتا كەتۋ كەرەك. بۇل كومپانيا Netflix كە دە دەرەكتى جانە كوركەم توپتامالار ءتۇسىرىپ جۇرگەن ۇجىم رەتىندە تانىمال. ال التىن وردا تاريحى تۋرالى توپتاما جوباسىنا پرەزيدەنت باستامالارىنىڭ Dara قورى قولداۋ كورسەتىپ كەلەدى.
ەسكە سالساق، ءساۋىر ايىنىڭ ورتاسىندا The Golden Empire تەلەحيكاياسىنىڭ ءتۇسىرىلىمى بەل ورتاسىنا تاياعانىن حابارلانعان بولاتىن.
