التاي اۋدانىنداعى بۇقتىرما وزەنىنىڭ سۋ دەڭگەيى كوتەرىلىپ كەتتى
وسكەمەن. KAZINFORM - شىعىس قازاقستان وبلىسى التاي اۋدانىندا بۇقتىرما وزەنىنىڭ سۋ دەڭگەيى كوتەرىلىپ كەتتى.
ش ق و اكىمى باسپا ءسوز قىزمەتىنىڭ مالىمەتىنە سۇيەنسەك، 7- ءساۋىر كۇنى وبلىستىق جەدەل شتابتىڭ كەزەكشى بولىمىنە التاي اۋدانى بوگاتىريەۆ اۋىلىنىڭ تۇرعىنى حابارلاسىپ، اۋلاسىنا سۋ كىرگەنىن جەتكىزدى. وقيعا ورنىنا جەدەل تۇردە اۋدان اكىمى، ت ج د جانە كوممۋنالدىق قىزمەت ماماندارى باردى.
«انىقتالعانداي، بۇقتىرما وزەنىنىڭ دەڭگەيى كوتەرىلىپ، اۋىلدىڭ ەكى تۇرعىنىنىڭ ۇيلەرىنىڭ اۋلاسىنا سۋ كىرگەن. قازىردە ش ق و ت ج د، جەرگىلىكتى اتقارۋشى ورگان قىزمەتكەرلەرى جانە اسكەريلەر سۋدى موتوپومپامەن سورۋ جۇمىستارىن جۇرگىزىپ جاتىر. جالپى سانى 10 تەحنيكا جۇمىلدىرىلعان. سۋ دەڭگەيى ءتۇسىپ جاتىر»، - دەلىنگەن اقپاراتتا.
اۋلاسىنا سۋ كىرگەن ەكى ۇيدە 4 ادام تۇرادى. ولار ەۆاكۋاتسيادان ءوز ەرىكتەرىمەن باس تارتىپ، تۋىسقاندارىنىڭ ۇيلەرىنە ۋاقىتشا تۇراقتادى.
اۋدان اكىمى زارداپ شەككەن ازاماتارمەن كەزدەسىپ، بارلىعى قىسقا ۋاقىتتا مەملەكەت تاراپىنان قالپىنا كەلتىرىلەتىنىن جەتكىزدى.
اۆتور
تالعاتجان مۇحامەتبەك ۇلى
