القابيلەر سوتى قانداي ىستەردى قارامايدى

сот
Фото: Kazinform

 استانا. KAZINFORM – ق ر جوعارعى سوتى سوت پروتسەسىنە قاتىسۋ ءۇشىن القابيلەردى ىرىكتەۋدىڭ ءمان- جايى تۋرالى تۇسىنىك بەردى.

«ولاردىڭ جەكە باسىن جاريالاماۋ ماڭىزدى. سوندىقتان القابيلەر القاسىنا كانديداتتاردى ىرىكتەۋ مىندەتتى تۇردە جابىق سوت وتىرىسىندا ءوتۋى كەرەك، ال ءىستى قاراۋ كەزىندە القابيلەردى تۇسىرۋگە تىيىم سالىنادى»، - دەلىنگەن جوعارعى سوتتىڭ Kazinform اگەنتتىگىنە بەرگەن جاۋابىندا.

سونىمەن قاتار، القابيلەر سوتىندا قىلمىستىق توپتىڭ ارەكەتتەرى، ەكسترەميستىك نەمەسە تەرروريستىك قىلمىستار تۋرالى ىستەر قارالمايتىنى حابارلاندى.

«بۇل تىيىم القابيلەرگە بولۋى مۇمكىن قىسىمعا توسقاۋىل قويۋ ءۇشىن ەنگىزىلدى. ويتكەنى، قىلمىستىق توپ مۇشەلەرىنىڭ سانى ايتارلىقتاي كوپ بولۋى مۇمكىن جانە ءىس قارالعان كەزدە بارلىق قاتىسى بار ادامدار ۇستالماۋى ىقتيمال»، - دەپ اتالىپ وتكەن جوعارعى سوت اقپاراتىندا.

بۇدان بۇرىن حابارلانعانداي، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ىسىنە قاتىستى سوت 27-ناۋرىزعا بەلگىلەندى.

بۇل رەتتە، ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى.

سوڭعى جاڭالىقتار