الەمدە تەمىرجولى جوق ەلدەر دە بار
استانا. KAZINFORM - بريتانيالىق ساراپشىلاردىڭ بولجاۋىنشا، 2050 -جىلعا قاراي الەم حالقىنىڭ سانى 9 جارىم ميللياردقا جۋىقتايدى. ولاردىڭ 75 پايىزى قالادا تۇرماق.
قازىر شاھار تۇرعىندارىنىڭ سانى كۇن سايىن 172 مىڭ 800 ادامعا تولىعادى ەكەن. وسىلاي جىلدام ءوسىپ جاتقان قالالاردىڭ اراسىن جالعايتىن ەڭ ءتيىمدى كولىك ءتۇرى - تەمىرجول بولماق. كەلەسى جىلى ىرگەمىزدەگى قىتايداعى جۇردەك پويىز جەلىسىنىڭ ۇزىندىعى 50 مىڭ شاقىرىمعا جەتەدى دەگەن اقپارات بار.
الەمدەگى تەمىرجول جەلىسىنىڭ جالپى ۇزىندىعى 13 ميلليون شاقىرىمنان اسادى. ولاردىڭ كوبى مىنا ەلدەرگە تيەسىلى. ءبىرىنشى ورىندا – ا ق ش. قىتاي ودان 61 مىڭ شاقىرىمعا از. العاشقى بەستىككە كورشىمىز رەسەي، ءۇندىستان جانە كانادا كىرەدى. ودان كەيىنگى ورىنداردا گەرمانيا، ارگەنتينا، اۆستراليا، برازيليا مەن فرانسيا تۇر.
ەڭ ۇزىن تەمىرجول جەلىسى بار 10 ەل
1. اقش 220,044 شاقىرىم
2. قىتاي 159,000 شاقىرىم
3. رەسەي 105,000 شاقىرىم
4. ءۇندىستان 68,584 شاقىرىم
5. كانادا 49,422 شاقىرىم
6. گەرمانيا 40,422 شاقىرىم
7. ارگەنتينا 36,966 شاقىرىم
8. اۆستراليا 33,168 شاقىرىم
9. برازيليا 29,817 شاقىرىم
10. فرانسيا 27,483 شاقىرىم
بۇل رەيتينگتە قازاقستان 21-ورىندا تۇر. وندا ەلىمىزدىڭ تەمىرجول جەلىسىنىڭ ۇزىندىعى 15530 دەپ كورسەتىلگەن. بىزدەن كەيىن تۇركيا 13 مىڭ، بەلارۋس پەن تۇرىكمەنستان 5 مىڭ، باۋىرلاس وزبەكستان 4669، ازەربايجان 2068، ال قىرعىزستان 417 شاقىرىم دەپ بەرىلگەن.
تاعى ءبىر قىزىقتى مالىمەت. الەمدە تەمىرجولى جوق ەلدەر دە بار ەكەن. بۇل قاتارعا اندوررا، باحرەين، بۋتان، چاد، كۋۆەيت، تۋۆالۋ جانە مالديۆ، مارشالل، سەيشەل ارالدارى جاتادى.
الەمدىك رەكورد تەمىرجول يگىلىگىن بارىنشا كورىپ وتىرعان ەل - كورشىلەس قىتاي. سوڭعى 1 ايدىڭ وزىندە شويىن جولمەن 332 ميلليون توننا جۇك تاسىمالدانعان. بۇل بىلتىرعى كورسەتكىشپەن سالىستىرعاندا 6,1 پايىزعا جوعارى دەيدى قىتايدىڭ تەمىرجول وپەراتورى. جولاۋشى تاسىمالى دا ءوسىپ جاتىر. ءبىرىنشى جارتىجىلدىقتا كورشى ەلدەگى تەمىرجول جولاۋشى ساپارى 2 ميللياردتان اسقان. بۇدان بولەك، قىتاي سۋتەگىمەن جۇرەتىن العاشقى پويىزدى سىناقتان ءساتتى وتكىزدى.
سون ۋەي، سينشۋو تەمىرجول لوكوموتيۆ كومپانياسىنىڭ نۇسقاۋشىسى:
- سۋتەگىمەن جۇرەتىن بۇل پويىز ەنەرگيانى ۇنەمدەپ، ەكولوگيالىق جاعىنان تازا عانا ەمەس، سونداي- اق وتە قۋاتتى. ول جىلدامدىعىن ساعاتىنا 160 شاقىرىمعا دەيىن جەتكىزە الادى. جۇك تارتۋ كۇشى - 10 مىڭ توننا.
ەلەكتر پويىزدارىنىڭ ۇلەسى
جالپى الەمدە قازىر ەلەكتر پويىزىنا كوبىرەك باسىمدىق بەرىلىپ جاتىر. وسى ساتكە دەيىن دۇنيەجۇزى بويىنشا 10 مىڭنان استام ەلەكتر پويىزى پايدالانۋعا بەرىلگەن. ەۋروپالىق ينۆەستيتسيالىق بانك وسى سالانى دامىتۋعا 39 ميلليارد ەۋرو قۇيدى. «كارى قۇرلىق» ەكولوگيالىق جاعىنان زيانسىز پويىزداردىڭ ۇلەسىن 2030 -جىلعا قاراي 50 پايىزعا جەتكىزۋدى كوزدەپ وتىر.
ەرنات مەلس ۇلى، 24.KZ
