الەمدە دەنە مۇشەلەرىن ساقتاندىراتىن ايگىلى ادامدار كوبەيىپ بارادى

استانا. قازاقپارات - قازاقستاندا ءوز ءومىرىن ساقتاندىرۋ اركىمنىڭ ءوز قالاۋى، ال شەت ەلدەردە مىندەتتى سانالادى، دەپ حابارلايدى 24kz.

ياعني، ادامدار قالاسا دا، قالماسا دا ءومىرىن ساقتاندىرادى. بۇدان بولەك، الەمدە ءبىر قىزىق ترەند بار. ايگىلى ادامدار اراسىندا دەنە مۇشەسىن ساقتاندىرۋ سانگە اينالعان. ويتكەنى ول ادامدى اتاقتى ەتىپ تۇرعان وسى دەنە مۇشەسى.

ءانشى نيكولاي باسكوۆ داۋىسىن 4 ميلليونعا ساقتاندىرعان

الىسقا بارماي-اق كورشىلەرىمىزدەن باستايىق. ءانشى نيكولاي باسكوۆ 2009 -جىلى داۋىسىن 4 ميلليون ەۋروعا 1 جىلعا ساقتاندىرعان. ول بۇعان تالىمگەرى مونسەررات كابالە كوندىرگەنىن ايتقان بولاتىن. ءبىراق ودان بەرى 15 جىل ءوتتى. ارى قاراي ۇزارتتى ما الدە توقتاتىپ قويدى ما - باسقا ەشقانداي اقپارات جوق.

ۆالەري لەونتيەۆتىڭ اياعى $10 مىڭ تۇرادى

تاعى ءبىر رەسەيلىك ءانشى دەنە مۇشەسىن ساقتاندىرعان. قازاقستاندىقتار جاقسى بىلەتىن ۆالەري لەونتيەۆ داۋسىن ەمەس، اياعىن ساقتاندىرعان. كەيبىر ساراپشىلار «ول كونسەرتتەردە كوپ سەكىرەتىن، سوندىقتان ساقتاندىرعان بولار» دەپ توپشىلايدى. ءبىراق سوماسى اسا ۇلكەن ەمەس، 10 مىڭ دوللار. نەگىزى لەونتيەۆ جارتى ميلليون دوللارعا ساقتاندىرعىسى كەلگەن. ءبىراق ءبىر كەزدەرى ول تىزەسىن جارالاعان ەكەن، سوندىقتان ساقتاندىرۋ كومپانياسى ءوزى قالاعان اقشانى قويۋدان باس تارتقان.

دەۆيد بەكحەم اياعىن £100 ميلليونعا ساقتاندىرعان

بيىل 49 مۇشەل جاسقا شىققان دەۆيد بەكحەم اياعىن ساقتاندىرعان. الەمدىك فۋتبولدىڭ جارىق جۇلدىزىنىڭ قوس اياعىنىڭ قۇنى 100 ميلليون فۋنت ستەرلينگ تۇرادى. بۇل ءبىزدىڭ ۆاليۋتاعا شاققاندا 6,5 ميلليارد تەڭگە. ياعني بەكحەم جاراقات العاندا عانا ەمەس، سىرتقى ءتۇرى وزگەرسە دە، اقشا الادى. ويتكەنى ول جاي عانا اياقدوپشى ەمەس، ول - مودەل.

امەريكالىق فۋتبولشىنىڭ شاشى $1 ميلليون تۇرادى

امەريكا فۋتبولىنىڭ جۇلدىزى تروي پولامالۋ دا بەكحەمگە ەلىكتەپ دەنە مۇشەسىن ساقتاندىردى. ءبىراق قىزىق قىلعاندا، دوپ تەبەتىن اياعىن ەمەس، شاشىن ساقتاندىرعان. قۇنى - 1 ميلليون دوللار. ياعني، 480 ميلليون تەڭگەدەن اسادى. اياقدوپشى شاشىن 10 جىل وسىرگەن جانە ەشقاشان قيدىرماعان.

اكتريسا دجۋليا روبەرتس ءتىسىن $30 ميلليون ساقتاندىرعان

تاعى ءبىر تانىمال امەريكالىق دجۋليا روبەرتس ءتىسىن ساقتاندىرعان. اتاقتى اكتريسانىڭ 32 ءتىسى 30 ميلليون دوللار تۇرادى. دجۋليا «چارلي چاپليننىڭ مۇرتى قانداي ايگىلى بولسا، مەنىڭ تىستەرىم دە الەمدىك كينو تاريحىندا ماڭگىلىك ەستە قالار» دەپ ۇمىتتەنەدى ەكەن.

گيتاراشى كيت ريچاردستىڭ ساۋساعى $1,6 ميلليون تۇرادى

اتى اڭىزعا اينالعان بريتانيالىق The Rolling Stones توبىنىڭ گيتاريسى كيت ريچاردس سول قولىنداعى ورتاڭعى ساۋساقتى 1 ميلليون 600 مىڭ دوللارعا ساقتاندىرعان. ارىپتەستەرى نەگىزى بۇل ساۋساق وعان اسپاپتا ويناۋ ءۇشىن ەمەس، كونسەرتتە كورەرمەنگە نۇقىپ كورسەتۋ ءۇشىن كەرەك دەيدى.

الەمدە ساقتاندىرۋ سىياقىسى ءوسىپ بارادى

كەيىنگى اقپارات بويىنشا الەمدە ساقتاندىرۋ كومپانيالارى 5 تريلليون 600 ميلليارد ەۋرو سىياقى تاپقان. بۇل - رەكوردتى كورسەتكىش. دۇنيەجۇزى بويىنشا ادامدار ءومىرىن، دەنساۋلىعى مەن مۇلكىن كوپتەپ ساقتاندىرۋعا كوشكەن. بۇل تۋرالى گەرمانيانىڭ ساقتاندىرۋ سالاسىن شولۋ جاسايتىن «اليانس» كومپانياسى مالىمدەدى. ساقتاندىرۋ بويىنشا ا ق ش پەن ەۋروپا ەلدەرى كوش باستاپ تۇر. «اليانس» كومپانياسى الداعى ۋاقىتتا ساقتاندىرۋ كولەمى جىلىنا ورتاشا العاندا % 5-6 ءوسىپ وتىرادى بولجايدى. قۇدايدىڭ ءوزى «ساقتانساڭ، ساقتايمىن» دەيدى.