الماز وندىرىسىنە قىرۋار قاراجات سالىپ، سان سوعىپ قالدى
اقتاۋ. KAZINFORM - ماڭعىستاۋدا ءبىر توپ تۇرعىن الاياققا جەم بولعاندارىن ايتىپ، وبلىستىق پروكۋرارۋرانىڭ الدىنا جينالدى. ولار جارناماعا سەنىپ، وڭباي الدانعان.
2019 -جىلى «Sax Invest» كومپانياسىنا الماز ءوندىرىسى ءۇشىن ءارقايسىسى 10-15 مىڭ ا ق ش دوللارى كولەمىندە قارجى اۋدارىپتى. الايدا، قاراشا حالىقتىڭ سەنىمىنە كىرگەن كومپانيا باسشىسى تۇرعىنداردىڭ قاراجاتىن يەمدەنىپ، بايلانىستى ۇزگەن.
تۇرعىنداردىڭ ايتۋىنشا، الدانعانداردىڭ سانى ءبىر مىڭعا جۋىقتايدى.
- ءساتجان دەگەن جىگىت. ول بىزگە اقشانى قايتارامىز دەپ، مىندەتتەمە قاعازىن بەردى. سوعان سەنىپ قالدىق. ءبىراق، ول كىسى كەيىن حابارسىز كەتتى. تەك الەۋمەتتىك جەلىدەن باقىلاپ، انگولادا جۇرگەنىن كورەمىز. سوعان سەنىپ وسى ۋاقىتقا دەيىن وتىردىق، - دەيدى، اقتاۋ قالاسىنىڭ تۇرعىنى گۇلشار بەرگارينا.
قالا تۇرعىنى اللا گافۋلەر اتالعان كومپانياعا كولىگىن ساتىپ، 10 مىڭ دوللار تولەگەن. سودان اي سايىن 2 پايىز پايدا تۇسەدى دەپ سەندىرگەن.
- بۇل كىسى بىزگە كەلىپ ءوز كومپانياسىن جارنامالاپ، اكسياعا ينۆەستيتسيا سالاسىڭدار دەپ الدادى. ونىڭ سوزىنە سەنىپ، مەن كولىگىمدى ساتىپ 10 مىڭ ا ق ش دوللارىن سالدىم. سالعان اقشامىزدى قايتاراتىن كەپىلحاتىن دا بەردى. مىنە، بەس جىل بويى تابىس تۇگىلى، ءوز اقشامىزدى الا الماي وتىرمىز، - دەيدى ول.
ماڭعىستاۋ وبلىستىق پروكۋراتۋراسىنىڭ باسقارما باسشىسى دانيار تولەگەنوۆتىڭ مالىمدەۋىنشە، وسى ىسكە قاتىستى استانا قالاسىندا قىلمىستىق ءىس قوزعالىپ، كۇدىكتىلەر قاماۋعا الىنعان.
- استانا قالالىق ەكونوميكالىق تەرگەۋ دەپارتامەنتىمەن قىلمىستىق كودەكستىڭ 217-بابىنىڭ 3-بولىگىمەن سوتقا دەيىنگى تەرگەپ-تەكسەرۋ جۇرگىزىلۋدە. وسى ءىس بويىنشا اتالعان ورگانمەن كۇدىكتى تۇلعالار ۇستالدى. بۇدان باسقا تەرگەۋ ارەكەتتەرى تاعى جالعاسۋدا. سونىمەن قاتار بۇگىن ماڭعىستاۋ وبلىسى پروكۋراتۋراسىنىڭ باسشىلىق قۇرامىمەن وسى سالىمشىلارعا جەكە قابىلداۋ جۇرگىزىلىپ، ءتيىستى زاڭدى تۇسىندىرمە بەرىلدى، - دەيدى دانيار تولەگەنوۆ.
قارجىلىق مونيتورينگ اگەنتتىگىنىڭ مالىمەتىنشە، «Sax Invest» كومپانياسى حالىقتىڭ 9 ميلليارد تەڭگەگە جۋىق قاراجاتىن يەمدەنگەن.
بۇعان دەيىن ماڭعىستاۋ وبلىسىندا قاتەرلى دەرتكە شالدىققان ناۋقاستار جاردەماقىدان قاعىلعانىن جازعانبىز.
اۆتور
اياگوز ىزباساروۆا
