الماتىدا تاماعىنا تەمىر كىرىپ كەتكەن بالاعا 1,5 ساعات وپەراتسيا جاسالدى
الماتى. KAZINFORM - الماتىلىق دارىگەرلەر تاماعىنا قورشاۋدىڭ تەمىرى كىرىپ كەتكەن 9 جاستاعى بالانى امان الىپ قالدى.
الماتى قالالىق دەنساۋلىق ساقتاۋ باسقارماسىنىڭ مالىمەتىنشە، تاماعىنا ۇشكىر تەمىر كىرىپ كەتكەن بالا جەدەل جاردەم بريگاداسىمەن بالالار شۇعىل مەديتسينالىق كومەك كورسەتۋ ورتالىعىنىڭ قابىلداۋ بولىمىنە جەتكىزىلدى. اكەسىنىڭ ايتۋىنشا، بالا ۆەلوسيپەدتەن تەمىر قورشاۋعا قۇلاپ، جاراقات العان.
«بالاعا ارالاس جاراقات دياگنوزى قويىلدى. جابىق باس سۇيەك-مي جاراقاتى، ميدىڭ شايقالۋى، تراحەيا مەن اۋىز قۋىسىنىڭ زاقىمدالۋى مەن مويىن جاراقاتى. بالانىڭ مويىن ايماعىندا ۇزىندىعى 6 س م جارا بولدى، ودان 4 س م/10 س م ولشەمدى بوگدە زات - مەتالل قورشاۋ بولىگى شىعىپ تۇردى»، - دەيدى دەرىگەرلەر.
بالانىڭ جاعدايى اۋىر دەپ باعالاندى. ناۋقاس جەدەل تۇردە وتا جاساۋ بولمەسىنە جەتكىزىلدى. جوعارعى شەتى نايزانىڭ ۇشى ءتارىزدى بولىپ شىققان مەتالل قورشاۋدىڭ ءبىر بولىگىن الىپ تاستاۋ ءۇشىن حيرۋرگتارعا 1,5 ساعات قاجەت بولدى.
«جاراقات ناتيجەسىندە بالانىڭ تراحەياسى (2 ساقيناسى جىرتىلعان)، قالقانشا بەزى، تومەنگى وڭ جاقتىڭ ارتقى قىرتىستىق تاباقشاسىنىڭ قوزعالعىشتىعى، وڭ جاعىنىڭ شىرىشتى قاباتى قاتتى زاقىمدالعان»، - دەيدى جوعارى ساناتتى دارىگەر، ورتالىقتىڭ جاق- بەت حيرۋرگى، ايدا ۋرازايەۆا.
قازىر بالانىڭ جاعدايى تۇراقتى.
دۇيسەنبى كۇنى ناۋقاس جانساقتاۋ بولىمىنەن نەيروحيرۋرگيا بولىمشەسىنە اۋىستىرىلدى، ەم قابىلداپ جاتىر.
اۆتور
الما مۇقانوۆا
