الماتىدا قىتايدان قازاقستانعا تاۋارلاردى كونتراباندالىق جولمەن اكەلۋ بويىنشا قىلمىستىق ىسكە ايىپتاۋ ۇكىمى شىعارىلدى

استانا. قازاقپارات - الماتى قالاسىندا قىتايدان قازاقستانعا، حالىق تۇتىناتىن تاۋارلاردى كونتراباندالىق جولمەن اكەلۋ جانە اسا ءىرى مولشەردە جالعان شوت-فاكتۋرالار جازۋ دەرەگى بويىنشا قىلمىستىق ىسكە ايىپتاۋ ۇكىمى شىعارىلدى.

 قىلمىستىق ءىستى قارجىلىق مونيتورينگ اگەنتتىگىنىڭ الماتى قالاسى بويىنشا دەپارتامەنتى تەرگەدى. تەرگەۋ بارىسىندا «Group of the Companies TDA» ج ش س ۋاكىلەتتى ەكونوميكالىق وپەراتور مارتەبەسىنە يە بولا تۇرا، قىتايدان 100-دەن استام كونتەينەردى زاڭسىز جولمەن ەلىمىزگە كىرگىزگەنى انىقتالدى. سونىمەن قاتار ولاردىڭ باقىلاۋىنداعى 10 جاۋاپكەرشىلىگى شەكتەۋلى سەرىكتەستىك ارقىلى جالعان شوت-فاكتۋرالار جازىلعان.

مەملەكەتكە كەلتىرىلگەن زالال (قوسىلعان قۇن سالىعى، كورپوراتيۆتىك تابىس سالىعى جانە كەدەندىك تولەمدەر بويىنشا) 10 ميلليارد تەڭگەنى قۇرادى. سوتقا دەيىنگى تەرگەپ-تەكسەرۋ بارىسىندا مەملەكەت بيۋدجەتىنە 643 ميلليون تەڭگە ءوندىرىپ الىندى. سوت سانكسياسىمەن: جالپى قۇنى 1,3 ميلليارد تەڭگە بولاتىن تاۋارلارعا، كۇدىكتىلەرگە تيەسىلى 300 ميلليون تەڭگە سوماسىنداعى مۇلىككە (جەر تەلىمدەرى، اۆتوكولىكتەر، باگگي كولىكتەرى، جىلجىمالى شاتىرلار جانە ت. ب.) شەكتەۋ قويىلدى. بۇعان قوسا، اتالعان كومپانيامەن بايلانىستا بولعان 47 سەرىكتەس كاسىپورىن ءوز ەركىمەن ءوزارا ەسەپ ايىرىسۋدى توقتاتىپ، بيۋدجەتكە 240 ميلليون تەڭگە سالىق تولەگەن. الماتى قالاسىنىڭ المالى اۋداندىق سوتىنىڭ ۇكىمىمەن كىنالى تۇلعالار مۇلكىن تاركىلەي وتىرىپ، 1 جىل 4ايدان 4 جىل 6 ايعا دەيىن باس بوستاندىعىنان ايىرۋ جازاسىن تاعايىندادى. سونىمەن قاتار ىسكە قاتىسى بار ءبىر ادامعا حالىقارالىق ىزدەۋ جاريالاندى.