الماتىدا قوعامدىق كولىك جولاقىسى كوتەرىلدى

الماتى. KAZINFORM - الماتىدا قوعامدىق كولىكتەگى جول ءجۇرۋ اقىسى 120 تەڭگە بولدى. جاڭا تاريف تامىز ايىنىڭ باسىنان باستاپ كۇشىنە ەنەدى.

قالا تۇرعىندارىنىڭ ءبىرى اكىم ەربولات دوسايەۆپەن كەزدەسۋ بارىسىندا جولاقى قاشان كوتەرىلەتىنىن سۇرادى.

بۇل ساۋالعا قالالىق موبيلدىلىك باسقارماسىنىڭ باسشىسى ساعىندىق تەلىبايەۆ جاۋاپ بەردى.

«الماتى قالاسى ءماسليحاتىنىڭ دەپۋتاتتارى وتكەن اپتادا قوعامدىق كولىكتە ءجۇرۋدىڭ جاڭا تاريفىن 120 تەڭگە دەپ بەكىتتى. جاڭا تاريف تامىز ايىنىڭ 3 مەن 5- ءى ارالىعىندا كۇشىنە ەنەدى»، - دەدى ول.

بۇدان بولەك، الماتى اكىمى جول اقىسىن بانك كارتاسىمەن تولەۋ مۇمكىندىگى قاراستىرىلىپ جاتقانىن اتاپ ءوتتى.

«وڭاي» قاجەتتى كەلىسىمدەرگە قول قويىپ، تولەم جۇيەسى مارتەبەسىن الدى. سوندىقتان بانك كارتاسىمەن تولەۋ ماسەلەسى شەشىلەدى دەپ ويلايمىن. ءبىز تولەمنىڭ بارلىق تۇرلەرىن كورسەتتىك»، - دەدى اكىم.

ول بۇگىندە قولما-قول اقشاسىز ەسەپ ايىرىسۋدىڭ بىرنەشە ءادىسىن اتادى:

- «وڭاي» فيليالدارىندا جانە كليەنتتەرگە قىزمەت كورسەتۋدىڭ 115 پۋنكتىندە ساتىپ الۋعا بولاتىن كولىك كارتاسى ارقىلى؛

- SMS ارقىلى؛

- موبيلدى قوسىمشا ارقىلى (شەتەلدىك قوناقتارعا ىڭعايلى بولۋ ءۇشىن ينتەرفەيستى اعىلشىن تىلىندە ەنگىزۋ پىسىقتالۋدا).

«تۋريستەرگە Visit Almaty ارقىلى كىرۋگە مۇمكىندىك بەردىك. ولار دا قالىپتى تۇردە تولەيتىن بولادى. سونىمەن قاتار، «وڭاي» جۇيەسى باسقا قىزمەتتەرگە: مۇراجايلارعا جانە باسقا جەرلەرگە بارۋعا ءتيىستى جەڭىلدىكتەر بەرەدى. بۇل قانشا كۇن جۇرگەنىڭىزگە بايلانىستى. سونىڭ ىشىندە مەترو، تروللەيبۋس، اۆتوبۋستارعا وتىرسا ءتيىستى جەڭىلدىك قاراستىرىلادى»، - دەدى اكىم.

وسىعان دەيىن الماتىدا قوعامدىق كولىكتە جول ءجۇرۋ اقىسى 20 تەڭگەگە قىمباتتاعانى تۋرالى جازعان ەدىك.

اۆتور

الما مۇقانوۆا