الماتىدا مۇقانوۆ كوشەسىن ۇزارتۋ ءۇشىن جەر ۋچاسكەلەرى ءماجبۇرلى تۇردە الىنادى

الماتى. KAZINFORM - الماتى اكىمدىگى مۇقانوۆ كوشەسىن ۇزارتۋ جۇمىستارىن جالعاستىرۋ ءۇشىن جەر تەلىمدەرىن ءماجبۇرلى تۇردە الۋ تۋرالى قاۋلى شىعاردى.

مەملەكەت مۇقتاجى ءۇشىن جەر تەلىمدەرىن الىپ قويۋعا بايلانىستى جەر تەلىمدەرىن نەمەسە وزگە دە جىلجىمايتىن مۇلىكتى ماجبۇرلەپ يەلىكتەن شىعارۋدى باستاۋ تۋرالى قاۋلى الماتى قالالىق جەر قاتىناستارى باسقارماسىنىڭ سايتىندا جاريالاندى.

«مۇقانوۆ كوشەسىن گوگول كوشەسىنەن رايىمبەك داڭعىلىنا دەيىن ۇزارتۋ ءۇشىن الماتى قالاسى، المالى اۋدانىندا ورنالاسقان جەر ۋچاسكەلەرىن مەملەكەت مۇقتاجى ءۇشىن الىپ قويۋعا بايلانىستى جەر ۋچاسكەلەرىن نەمەسە وزگە دە جىلجىمايتىن مۇلىكتى وسى قاۋلىنىڭ قوسىمشاسىنا سايكەس ماجبۇرلەپ يەلىكتەن شىعارۋ باستالسىن»، - دەلىنگەن قۇجاتتا.

قاۋلىعا سايكەس، ماجبۇرلەپ يەلىكتەن شىعارۋ 2026 -جىلدىڭ 31 -جەلتوقسانىنا دەيىن اياقتالۋى ءتيىس.

تاركىلەۋگە جاتاتىن جىلجىمايتىن مۇلىكتىڭ يەلەرى وتەماقى تولەۋ جانە ودان ءارى ارەكەت ەتۋ ماسەلەلەرى بويىنشا الماتى قالاسى، بوستاندىق اۋدانى، اباي داڭعىلى، 90، 801 كابينەت مەكەنجايى بويىنشا كەڭسەگە حابارلاسا الادى.

«الماتى قالاسىنىڭ جەر قاتىناستارى باسقارماسى» كوممۋنالدىق مەملەكەتتىك مەكەمەسىنە مەنشىك يەلەرىن حاباردار ەتىپ، زاڭعا سايكەس وتەماقى تولەۋدى قامتاماسىز ەتۋ تاپسىرىلدى. اتالعان پروتسەس اياقتالعاننان كەيىن جەر تەلىمدەرى الماتى قالالىق موبيلدىلىك باسقارماسىنىڭ بالانسىنا بەرىلەدى.

وسىعان دەيىن رىسقۇلوۆ داڭعىلىن ۇزارتۋ ءۇشىن الاتاۋ اۋدانىنداعى وڭعارسىنوۆا كوشەسىنەن قالا شەكاراسىنا دەيىن ورنالاسقان 72 جەر ۋچاسكەسى مەملەكەت قاجەتتىلىگىنە ءماجبۇرلى تۇردە الىنعانى تۋرالى جازعان ەدىك.

اۆتور

الما مۇقانوۆا