الماتى زووباعىندا پراگادان جەتكىزىلگەن اق ايۋ ءولىپ قالدى

الماتى. KAZINFORM - الماتى زووباعىنا ەكى اي بۇرىن پراگادان جەتكىزىلگەن توم اتتى اق ايۋى ءولدى.

بۇل تۋرالى پراگا زووباعىنىڭ ديرەكتورى ميروسلاۆ بوبەك ءوزىنىڭ Facebook پاراقشاسىندا جازدى.

ول اق ايۋ 4 -مامىردا ولگەنىن، ءبىراق الماتى زووباعى بۇل جونىندە ولارعا 22 -مامىردا عانا حابار بەرگەنىن اتاپ ءوتتى.

«قازىر الماتى حايۋاناتتار باعىنداعى جاعداي بىزدىكىنە قاراعاندا جاقسى، تومنىڭ كوبەيۋىنە جاعداي جاسالۋى كەرەك ەدى. توم بىزدەن 28-ناۋرىزدا ەشقانداي اۋرۋ بەلگىلەرىنسىز كەتتى. ءبىزدىڭ بىلۋىمىزشە، الماتىعا ەش قيىندىقسىز جەتكىزىلدى. كەيىن الماتىدان سۋرەتتەر مەن جازباشا ەسەپتەردى الدىق. ەڭ سوڭعىسى 15-ساۋىردە «ايۋدىڭ جاعدايى جاقسى» دەپ ناقتى ايتىلعان»، - دەپ اتاپ ءوتتى ول.

ميروسلاۆ بوبەك كەيىننەن الماتى زووباعىنان ەشقانداي حابار كەلمەي قالعاندىقتان، قازاقستانعا قىزمەتكەرلەرىن جونەلتۋدى ءجون كورگەندەرىن جەتكىزدى.

«ءبىراق 22-مامىردا الماتى زووباعى تومنىڭ ولگەنىن ايتتى. ولار بۇل حاباردى نەگە 18 كۇن بويى جاسىرعانىن تۇسىنبەيمىن. تومنىڭ ءولىمى بويىنشا اشىق تەرگەۋدى تالاپ ەتەمىز جانە شاعىمدى زووباقتار مەن اكۆاريۋمداردىڭ ەۋروپالىق اسسوتسياتسياسى چەحيانىڭ قازاقستانداعى ەلشىلىگىنە جانە قازاقستاننىڭ چەحياداعى ەلشىلىگىنە جىبەرەمىز»، - دەپ جازدى ول.

ال، الەۋمەتتىك جەلىلەردە چەحيانىڭ كوپتەگەن تۇرعىنى الماتى زووباعىنا نارازىلىقتارىن ءبىلدىرىپ، جان-جاقتى تەكسەرۋدى تالاپ ەتىپ جاتىر.

قازاقپارات اگەنتتىگى الماتى زووباعىنا ءمان-جايدى تولىق ءتۇسىندىرىپ بەرۋ تۋرالى ساۋال جولدادى.

اۆتور

الما مۇقانوۆا