الەم حالقىن بەيبىتشىلىككە شاقىراتىن جاڭا جاھاندىق قوزعالىس قاجەت - قاسىم-جومارت توقايەۆ

 مەملەكەت باسشىسى قاسىم-جومارت توقايەۆ الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 21-وتىرىسىنا قاتىسۋشىلارعا قۇتتىقتاۋ جولدادى. پرەزيدەنت قۇتتىقتاۋىن سەنات ءتوراعاسى ماۋلەن اشىمبايەۆ وقىپ بەردى، دەپ حابارلايدى Kazinform اگەنتتىگى. 

«اسا مارتەبەلى ءدىن وكىلدەرى، قادىرلى مەيماندار! بارشاڭىزدى الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 21-وتىرىسىنىڭ اشىلۋىمەن شىن جۇرەكتەن قۇتتىقتايمىن! بيىل العاشقى سەزدىڭ شاقىرىلعانىنا - 20 جىل. بۇل يگى باستاما ءوزىنىڭ ومىرشەڭدىگىن دالەلدەپ، از ۋاقىتتىڭ ىشىندە ماڭىزدى وركەنيەتارالىق ديالوگ الاڭىنا اينالدى. فورۋم ءدىنارالىق تاتۋلىق پەن كەلىسىمدى نىعايتۋعا، بۇكىل ادامزاتقا ورتاق تۇيتكىلدەردىڭ شەشىمىن تابۋعا جانە تولەرانتتىلىقتى دارىپتەۋگە سەپتىگىن تيگىزىپ كەلەدى. باس قوسۋ اياسىندا الەمنىڭ رۋحاني كوشباسشىلارى جاھان جۇرتشىلىعىن الاڭداتقان وزەكتى ماسەلەلەردى تالقىلاپ، بەيبىتشىلىكتى ساقتاۋ جانە ءوزارا قۇرمەت پەن سىيلاستىقتى ناسيحاتتاۋ تۋرالى ويلارىن ورتاعا سالادى»، - دەدى مەملەكەت باسشىسى قۇتتىقتاۋىندا.

پرەزيدەنت قازىر گەوساياسي احۋال ۋشىعىپ، ءتۇرلى سىن-قاتەرلەر كۇشەيىپ تۇرعانىنا نازار اۋدارتتى.

«وسى الماعايىپ كەزەڭدە ىزگىلىك، مەيىرىمدىلىك باۋىرمالدىق، جاۋاپكەرشىلىك سياقتى قاعيداتتاردىڭ قادىرى ارتا ءتۇستى. سونداي-اق حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ وتە ماڭىزدى ماسەلەگە اينالدى. ول ءۇشىن الەم حالقىن بەيبىتشىلىككە شاقىراتىن جاڭا جاھاندىق قوزعالىس قاجەت. بۇل رەتتە ءدىن كوشباسشىلارى ايرىقشا ءرول اتقارادى. رۋحاني ليدەرلەر وسى باعىتتا كۇش جۇمىلدىرىپ، بارشا ادامزاتقا ورتاق پروبلەمالاردى شەشۋگە سۇبەلى ۇلەس قوسادى دەپ سەنەمىن. حاتشىلىقتىڭ بۇگىنگى وتىرىسى دا وسى ماقساتقا وراي ۇيىمداستىرىلىپ وتىر. قازاقستان ءدىنارالىق جانە وركەنيارالىق ىنتىماقتاستىققا نەگىز بولاتىن باستامالارعا ءاردايىم قولداۋ كورسەتەدى. ونى سىرتقى ساياساتتىڭ نەگىزگى باسىمدىقتارىنىڭ ءبىرى رەتىندە ۇسىنادى»، - دەدى قاسىم-جومارت توقايەۆ.

اۆتور

مارلان جيەمباي