الماتىدا مەكتەپ باعدارلاماسىنا شاڭعى ساباقتارى ەنگىزىلۋى مۇمكىن

ءىس-شارا بارىسىندا Almaty SUPERSKI جانە «الماتى تاۋ كلاستەرى» جوبالارى تانىستىرىلدى. جيىنعا «اتامەكەن» ۇ ك پ، الماتى قالاسى اكىمدىگى، Kazakh Tourism Development Ltd, Almaty Tau Management وكىلدەرى، ينۆەستورلار مەن كاسىپكەرلەر قاتىستى.

Kazakh Tourism Development Ltd اتقارۋشى ديرەكتورى ەرجان ەركىنبايەۆ Almaty SUPERSKI باستاماسى اياسىندا الماتى مەكتەپتەرىنىڭ وقۋشىلارىنا دەنەشىنىقتىرۋ ساباقتارى اياسىندا مىندەتتى شاڭعى جاتتىعۋلارىن ەنگىزۋ جوسپارلانعانىن ايتتى.

— وليمپيادالىق ەلدەردە 100 مىڭعا جۋىق بالا ءبىر ماۋسىمدا كەمىندە 10 كۇن شاڭعى تەبەدى. ول دەنەشىنىقتىرۋ ساباعىنا قاتىسۋ رەتىندە سانالادى. الماتى اكىمدىگى بۇل باستامانى قولدادى. ازىرگە پيلوتتىق جوبا رەتىندە الماتى مەكتەپتەرىندە ەنگىزۋدى جوسپارلاپ وتىرمىز. ءبىراق الماتى تاۋ كلاستەرى تولىق اشىلعان سوڭ، مۇنداي تاجىريبە بىزدە دە بولادى، — دەدى ول.

سونداي-اق ول قالا كوللەدجدەرىنە تاۋ-شاڭعى ماماندىقتارى بويىنشا 300-350 گرانت بولىنەتىنىن اتاپ ءوتتى. جاڭا ماماندار الداعى ۋاقىتتا اشىلاتىن جاڭا ارقان جولدار مەن تاۋ كۋرورتتارىندا جۇمىس ىستەيتىن بولادى. ولاردىڭ قاتارىندا اسپالى جول ينجەنەرى، مەحانيكتەر، تراسسالار مەن قار جامىلعىسىن جاساۋ ينجەنەرى، قار پۋشكالارى بويىنشا مامان جانە ت. ب. ماماندار بولادى.

ەسكە سالايىق، بۇعان دەيىن الماتى تاۋ كلاستەرىن دامىتۋعا 526 ميلليارد تەڭگە جۇمسالاتىنىن جازعانبىز.