الاتاۋ قالاسىنا ارناۋلى قۇقىقتىق مارتەبە بەرىلدى
استانا. KAZINFORM - مەملەكەت باسشىسى «الاتاۋ قالاسىنىڭ ارناۋلى قۇقىقتىق رەجيمى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا قول قويدى، دەپ حابارلايدى اقوردا.
كونستيتۋتسيالىق زاڭنىڭ نەگىزگى ماقساتى - الاتاۋ قالاسىنىڭ قارقىندى ءارى ورنىقتى دامۋى ءۇشىن جاعداي جاساۋ.
قالانىڭ ەرەكشە قۇقىقتىق مارتەبەسىنە ساي يننوۆاتسيالار، ينۆەستيتسيالار جانە ەكونوميكالىق ءوسىم ءۇشىن قولايلى ورتا قۇرۋعا باعىتتالعان دەربەس ەكوجۇيەنى قالىپتاستىرۋدى كوزدەيتىن تۇبەگەيلى جاڭا تاسىلدەر قولدانىلادى.
كونستيتۋتسيالىق زاڭعا سايكەس، قالانى مەملەكەتتىك باسقارۋدىڭ جاڭا مودەلى ەنگىزىلدى. اتاپ ايتقاندا، كاسىپكەرلىك، كەدەن ءىسى، سيفرلىق اكتيۆتەر، قۇمار ويىندارى، الەۋمەتتىك سالا، قارجى نارىعى، ارحيتەكتۋرا مەن قالا قۇرىلىسى، ەكولوگيا ءارى قورشاعان ورتانى قورعاۋ، مادەنيەت، سپورت جانە تاعى باسقا سالالاردى رەتتەۋدىڭ نەگىزگى قاعيدالارى بەلگىلەندى.
«الاتاۋ رەزيدەنتى» قۇقىقتىق مارتەبەسى بەكىتىلدى. ارناۋلى مارتەبەنى اكىمشىلىك ءبىرقاتار سانات بويىنشا جەكە جانە زاڭدى تۇلعالارعا بەرەدى. ارنايى رەجيمنىڭ قولدانىلۋ كولەمى مەن ءتيىستى قۇقىقتار، مىندەتتەر مەن تالاپتار وسى رەزيدەنت مارتەبەسىنە قاراي انىقتالادى.
شاھاردىڭ ۇزاق مەرزىمدى ينۆەستيتسيالىق جانە تەحنولوگيالىق وركەندەۋى ستراتەگيالىق قۇجاتتار نەگىزىندە قامتاماسىز ەتىلەدى. ناقتى ايتقاندا، الاتاۋ قالاسىنىڭ ۇزاق مەرزىمدى دامۋ جوسپارى، ماستەر-جوسپارى جانە دامىتۋ ستراتەگياسى قابىلدانادى.
الاتاۋ قالاسىنىڭ قاۋىپسىزدىگىن، سونداي-اق «اقىلدى قالا» رەتىندە ءتيىمدى جۇمىس ىستەۋى مەن دامۋىن قامتاماسىز ەتۋ ماقساتىندا ينفراقۇرىلىم نىساندارى مەن قوعامدىق قاۋىپسىزدىكتى قامتاماسىز ەتۋ جۇيەلەرىنىڭ بارلىق دەرەگى ءبىرىڭعاي سيفرلىق باسقارۋ پلاتفورماسىنا بىرىكتىرىلەدى.
سونىمەن قاتار قالانىڭ ينۆەستيتسيالىق كليماتى مەن ينۆەستورلارعا بەرىلەتىن كەپىلدىكتەرى، سالىق-بيۋجەت ساياساتى، ديزاينى مەن جەر قاتىناستارى اتالعان كونستيتۋتسيالىق زاڭ اياسىندا رەتتەلەدى.
كونستيتۋتسيالىق زاڭنىڭ ءماتىنى باسپا سوزدە جاريالانادى.
ايتا كەتەيىك، بۇعان دەيىن الاتاۋدا قۇرىلىس جۇمىستارى قالاي ءجۇرىپ جاتقانى حابارلاندى.
