اكىمدىكتەرگە پەداگوگ مارتەبەسىنە قاتىستى تالاپتاردى تاعى دا ءتۇسىندىرۋ كەرەك - مينيستر

استانا. KAZINFORM - «پەداگوگ مارتەبەسى تۋرالى» زاڭ قابىلدانعاننان كەيىن ءپان مۇعالىمدەرىنىڭ تاپشىلىعى مەن ولاردىڭ جالاقىسى ماسەلەسى شەشىلدى مە؟ بۇل سۇراققا وقۋ-اعارتۋ ءمينيسترى عاني بەيسەمبايەۆ جاۋاپ بەردى.

- جالپى، مۇعالىمدەردىڭ ايلىعى ەكى ەسەدەن استام ءوستى. ونى مۇعالىمدەردىڭ وزدەرى دە ايتىپ ءجۇر. ەكىنشىدەن، مۇعالىمدەردىڭ قۇقىن قورعاۋعا قاتىستى توقتالساق، وسىدان 4-5 جىل بۇرىنعى جاعدايمەن سالىستىرساق، قۇقىق بۇزۋ دەرەكتەرى بىرنەشە ەسە ازايعانىن ايتۋ كەرەك. قازىر ارا-تۇرا وسىنداي جاعداي كەزدەسىپ جاتادى. وسىعان قاتىستى وڭىرلەردەگى اكىمدىك وكىلدەرىن قايتا جيناپ، پەداگوگ مارتەبەسىنە قاتىستى زاڭدى ەگجەي-تەگجەيلى ءتۇسىندىرۋ كەرەك. سوندىقتان بيىل تامىز ايىندا وسىنى ەسكەرىپ، تاعى دا تۇسىندىرەمىز، - دەدى ع. بەيسەمبايەۆ پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازىر وقۋ-اعارتۋ مينيسترلىگى عىلىم جانە جوعارى ءبىلىم مينيسترلىگىمەن بىرلەسە ساپالى كادرلاردى دايارلاۋعا قاتىستى جۇمىس ىستەپ جاتىر.

- بىلتىردىڭ وزىندە 14 مىڭ ستۋدەنت مەكتەپتە جۇمىسقا قابىلداندى، ال سۇرانىس 8 مىڭ بولعان. وسى ورايدا قازىر جاس مۇعالىمدەردىڭ سانى ارتتى. سونداي-اق زەينەت جاسىنداعى مىقتى مۇعالىمدەر دە بار، ولاردىڭ سانى 5 پايىزدان از، - دەدى مينيستر.

بۇدان بۇرىن حابارلانعانداي، عاني بەيسەمبايەۆ جەكەمەنشىك مەكتەپتەردەگى كەمشىلىكتەردى جويۋعا قاتىستى ءتيىستى ەرەجەنى قابىلداۋ جوسپارلانىپ وتىرعانىن ايتتى.

ايتا كەتەيىك، مۇعالىمدەردى ارتىق جۇمىسقا تارتۋ كۇرت تومەندەگەن.