اعزا اۋىستىرۋ وپەراتسياسى: الەمدىك تاجىريبە

 ا ق ش ادام اعزالارىن ترانسپلانتاسيالاۋ بويىنشا كوش باستاپ تۇر. سايكەسىنشە، ەلدە ءۇمىتىن ۇزبەي جۇرگەن ناۋقاستار سانى دا كوپ. قازىر 100 مىڭنان استام ادام كەزەك كۇتىپ وتىر. كۇن سايىن ەلدە 20-عا جۋىق ناۋقاس كوز جۇمادى. قۇراما شتاتتاردا ادام اعزالارىن ۇلەستىرۋ UNOS دەپ اتالاتىن ورتالىقتاندىرىلعان جۇيە ارقىلى جۇزەگە اسادى. بۇل جۇيە بيولوگيالىق سايكەستىك، سالماق، بوي جانە لوگيستيكالىق قولجەتىمدىلىك سياقتى باستى دۇنيەلەردى تالدايدى. قازىر امەريكالىقتار اراسىندا ەڭ تاپشى اعزا - بۇيرەك. دونورعا مۇقتاج جانداردىڭ %80- ى قانت ديابەتىنە شالدىققان. ودان بولەك باۋىرىنا ترانسپلانتاسيا كۇتىپ جۇرگەن ادام كوپ. ماماندار مۇنى الكوگولدى ىشىمدىك ءىشۋ كورسەتكىشىنىڭ جوعارى بولۋىمەن بايلانىستىرادى.

 يسپانيا

يسپانيادا مايىتتىك دونورعا كەلىسىم بەرگەن ازاماتتار بارشىلىق. ءار اۋرۋحانادا وسى باعىتتا ارنايى دارىگەرلەر جۇمىس ىستەيدى. ولار جانساقتاۋ بولىمىندە ناۋقاستاردى باقىلاپ، مي ءولىمى انىقتالعان جاعدايدا تۋىستارىمەن كەلىسسوز جۇرگىزەدى. زاڭ بويىنشا جاقىندارىنىڭ كەلىسىمى ماڭىزدى ەمەس. دەسە دە، يسپان دارىگەرلەرى كوپ جاعدايدا ولاردىڭ پىكىرىن ەسكەرۋگە تىرىسادى. قازىر ەلدە وكپە مەن باۋىر ترانسپلانتاتسياسىنا مۇقتاج جاندار كوپ. اسىرەسە ەگدە جاستاعىلار.

 يران

الەم بويىنشا يراندا عانا بۇيرەك دونورلارىنا رەسمي تۇردە اقى تولەنەدى. دونورلىققا كەلىسىم بەرگەن ازاماتقا مەملەكەت پەن ناۋقاس تاراپىنان وتەماقى بەرىلەدى. ەلدە كەزەك كۇتىپ، وتاعا جەتە الماي وتىرعاندار سانى الدەقايدا از. دەگەنمەن، بۇل باعدارلاما تەك يران ازاماتتارىنا ارنالعان. قازىر ەلدە ونداعان مامانداندىرىلعان ورتالىق جۇمىس ىستەيدى. ال ترانسپلانتاتسيادان كەيىنگى ءومىر ءسۇرۋ كورسەتكىشى %94- دى قۇراپ وتىر. بۇل تۇستا دارىگەرلەردىڭ جالاقىسى وتا سانىنا بايلانىستى ەمەس.

 تۇركيا

كەيىنگى جىلدارى تۇركياعا ەم ىزدەپ باراتىندار كوبەيدى. كوپشىلىك ەلدەگى وزىق تەحنولوگيالار مەن قولجەتىمدى باعاعا قىزىعادى. قازىر ىستامبۇل بۇيرەك پەن باۋىر ترانسپلانتاسياسى بويىنشا الدىڭعى ۇشتىككە كىرەدى. جەرگىلىكتى دەنساۋلىق ساقتاۋ مينيسترلىگىنىڭ دەرەكتەرىنە سايكەس، جىل سايىن 5 مىڭنان استام وتا جاسالادى. تۇرىك مەديتسيناسىنىڭ باستى ەرەكشەلىگى - روبوتتاندىرىلعان جۇيەلەر مەن لاپاروسكوپيالىق ادىستەردى كەڭىنەن قولدانۋىندا. بۇل تاسىلدەر وتادان كەيىن ادامنىڭ تەز وڭالىپ كەتۋىنە سەپ. الەمنىڭ تۇكپىر- تۇكپىرىنەن ناۋقاستاردىڭ دەنى قانت ديابەتى مەن گەپاتيتتى ەمدەۋگە بارادى ەكەن. ال زاڭسىز جولمەن پايدا تابۋعا تىرىساتىندار ءۇشىن قاتاڭ باقىلاۋ ەنگىزىلگەن. شەتەلدىك ناۋقاستار ارنايى ەتيكالىق كوميسسيادان ءوتىپ، دونورمەن تۋىستىق بايلانىسىن قۇجات جۇزىندە دالەلدەۋگە مىندەتتى.

24.kz