ماڭعىستاۋداعى تراگەديا: بەسەۋدەن بولەك تاعى ءبىر اسكەري شەنەۋنىك ۇستالدى

كىمدەر ۇستالدى؟

بۇعان دەيىن ءى ءى م قىزمەتكە سالعىرت قاراۋ جانە كەمە جۇرگىزۋ قاعيدالارىن بۇزۋ بويىنشا اۋىر زارداپتارعا اكەپ سوققان قىلمىستىق قۇقىقبۇزۋشىلىقتار جاسادى دەگەن كۇدىكپەن قازاقستان رەسپۋبليكاسى قارۋلى كۇشتەرىنىڭ جوعارى جانە اعا كوماندالىق قۇرامىنداعى بەس لاۋازىمدى تۇلعا ۇستالعانىن حابارلادى.

مينيسترلىك ولاردىڭ اتى-ءجونىن اتاعان جوق. ۇستالعاندار قاتارىندا ق ر ق ك اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى - شتاب باستىعى، ەكى اسكەري ءبولىمنىڭ كومانديرى، سونداي-اق، تەڭىز جاياۋ اسكەرى روتاسىنىڭ جانە «قايسار» كاتەرىنىڭ كومانديرلەرى بار.

دانيار حايرۋشيەۆ تۋرالى نە بەلگىلى؟

قورعانىس مينيسترلىگىنىڭ اشىق مالىمەتىنە سۇيەنسەك، ا ت ك باس قولباسشىسىنىڭ ءبىرىنشى ورىنباسارى لاۋازىمىن دانيار حايرۋشيەۆ اتقارادى. 2026-جىلعى مامىردا ۆەدومستۆو مەملەكەتتىك ناگرادالارمەن ماراپاتتالعان اسكەري قىزمەتشىلەر تىزىمىندە ونى ءدال وسى لاۋازىمدا كورسەتكەن.

كەيىنگى جىلدارى ونىڭ جۇمىسىنىڭ نەگىزگى باعىتتارىنىڭ ءبىرى اسكەري-تەڭىز كۇشتەرىنىڭ جاۋىنگەرلىك دايىندىعى بولعان. ال 2026-جىلعى مامىردا دانيار حايرۋشيەۆتىڭ لاۋازىمى جوعارىلاعان.

سول كەزدە قورعانىس مينيسترلىگى ونى اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى دەپ جاريالاعان.

ماڭعىستاۋداعى تراگەديا

24-قىركۇيەكتە قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە كاسپي تەڭىزى جاعالاۋىندا وقۋ-جاۋىنگەرلىك مىندەتتەردى ورىنداۋ بارىسىندا اۋا رايى كۇرت ناشارلاۋى جانە جەل كۇشەيۋىنە بايلانىستى اسكەري قىزمەتشىلەر سۋعا كەتكەن.

ناقتىلانعان مالىمەتكە سايكەس 17 ادام سۋعا كەتكەن. ونىڭ ىشىندە 14 اسكەري قىزمەتشى قازا تاپتى، ءۇش اسكەري قىزمەتشى قۇتقارىلعان.

باس پروكۋراتۋرا مالىمەتىنشە، اقتاۋ گارنيزونىندا وقۋ-جاتتىعۋ بارىسىندا اسكەري قىزمەتشىلەر قازا تابۋىنا بايلانىستى قىلمىستىق ءىس تەرگەلىپ جاتىر. تەرگەۋ بارىسى ەرەكشە باقىلاۋعا الىنعان.

پرەمەر-ءمينيستردىڭ وكىمىمەن ماڭعىستاۋ وبلىسىندا اسكەري وقۋ-جاتتىعۋلار وتكىزۋ بارىسىندا كوز جۇمعان اسكەري قىزمەتشىلەردىڭ قازاسىن تەرگەپ-تەكسەرۋ بويىنشا ۇكىمەتتىك كوميسسيا قۇرىلدى.

مەملەكەت باسشىسى ماڭعىستاۋ وبلىسىندا اسكەري قىزمەتشىلەر قازا تابۋىنا بايلانىستى كوڭىل ايتتى. قاسىم-جومارت توقايەۆ ۇكىمەتتىك كوميسسياعا وقيعانىڭ ءمان-جايىن انىقتاۋ ءۇشىن قاجەت شارالار قابىلداۋدى جانە قايتىس بولعان جانداردىڭ وتباسىنا كومەكتەسۋدى تاپسىردى.

مەملەكەت باسشىسىنىڭ وكىمىمەن ماڭعىستاۋ وبلىسىندا قىزمەتتىك مىندەتىن اتقارۋ كەزىندە اسكەري قىزمەتشىلەر قازاعا ۇشىراۋىنا بايلانىستى قازاقستان رەسپۋبليكاسىندا 25-قىركۇيەكتە جالپى ۇلتتىق ازا تۇتۋ جاريالاندى.

تەرگەۋ بارىسى

ىشكى ىستەر ءمينيسترىنىڭ ورىنباسارى سانجار ءادىلوۆتىڭ ايتۋىنشا، ق ر قىلمىستىق كودەكسىنىڭ 453-بابى 2-بولىگى («اۋىر زارداپتارعا اكەپ سوققان قىزمەتكە سالعىرت قاراۋ») جانە 465-بابى («كەمە جۇرگىزۋ قاعيدالارىن بۇزۋ») بويىنشا قىلمىستىق ىستەر قوزعالعان (سوتالدى تەرگەۋ باستالعان – ە س ك.).

سونىمەن قاتار، ماڭعىستاۋداعى اسكەري قىزمەتشىلەردىڭ قازاسىنا قاتىستى ءىس بويىنشا قورعانىس مينيسترلىگى جۇيەسىنەن بەس لاۋازىمدى تۇلعا ۇستالدى. ولاردىڭ بارلىعى كۇدىكتى دەپ تانىلىپ، اقتاۋ قالاسى پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى.