اباي وبلىسىنىڭ 13 مۇعالىمى مەن 2 وقۋشىسى الەمدىك رەكوردتار كىتابىنا ەندى
استانا. قازاقپارات - اباي وبلىسىنىڭ اكىمدىگى الماتى قالاسىنداعى مەدەۋ مۇز ايدىنىندا ۇلتتىق قولونەرگە ارنالعان بىرەگەي «الامان قۇراق - 2025» مادەني جوباسى ءوتتى.
ەلدىڭ ءار وڭىرىنەن جينالعان 660 قۇراقشى جالپى كولەمى 1366 شارشى مەترگە جايىلعان قۇراق كورپە قۇراپ، بۇل كورسەتكىش Global Book of Records دۇنيەجۇزىلىك رەكوردتار كىتابىنا تىركەلدى. بۇل - قازاقتىڭ قۇراق ونەرىنە ارنالعان تۇڭعىش الەمدىك رەكورد. اۋقىمدى جوباعا اباي جانە شىعىس قازاقستان وبلىستارىنان بارلىعى 34 قۇراقشى قاتىستى. ونىڭ ىشىندە اباي وبلىسىنان 13 مۇعالىم مەن 2 وقۋشى بار. قاتىسۋشىلار سەمەي، اياگوز، كوكپەكتى اۋداندارى مەن اباي اۋدانى (قاراۋىل اۋىلى) ءبىلىم بەرۋ مەكەمەلەرىنەن جينالدى. ولاردىڭ قاتارىندا قالا گيمنازيالارى مەن ليتسەيلەرىنىڭ، اۋىل مەكتەپتەرى مەن قوسىمشا ءبىلىم بەرۋ ۇيىمدارىنىڭ وكىلدەرى بار.
اباي جانە ش ق و بويىنشا جوبانىڭ وڭىرلىك ۇيلەستىرۋشىسى - سەمەي قالاسىنداعى №19 مەكتەپتىڭ مۇعالىمى باقىتجان شاپەنوۆا. ونىڭ جەتەكشىلىگىمەن ءوڭىر اتىنان قاتىسۋشىلار ۇلتتىق ونەردى جوعارى دەڭگەيدە ناسيحاتتاپ، ايماقتىڭ اتىن الەمدىك رەكوردتىق جوبادا تانىتتى. جوبانىڭ اۆتورى - اياگوز اۋدانى، تاڭسىق اۋىلىنىڭ تۋماسى، قولونەر جاناشىرى نۇرگۇل ابايحان. ونىڭ باستاماسىمەن جۇزەگە اسقان الەمدە تەڭدەسى جوق مادەني جوبا قازاق انالارىنىڭ اۋىز بىرشىلىگىن، قۇراق ونەرىنىڭ كوركەمدىگىن جانە ۇلتتىق قۇندىلىقتىڭ تەرەڭ ماعىناسىن الەمگە پاش ەتۋدى ماقسات ەتتى.
