اباي وبلىسىندا يمام كولىكپەن قاعىپ كەتكەن 11 جاستاعى قىز قازا بولدى

سەمەي. KAZINFORM - اباي وبلىسى ءۇرجار اۋدانىندا يمام كولىكپەن قاعىپ كەتكەن 11 جاستاعى قىز اۋرۋحانادا كوز جۇمدى. قازىر پوليتسيا تەرگەۋ جۇرگىزىپ جاتىر.

وقيعا 14-قازاندا ساعات 11:40 شاماسىندا ءۇرجار اۋىلىندا بولعان.

«Toyota Rav-4 ماركالى اۆتوكولىكتى تىزگىندەپ كەلە جاتقان 44 جاستاعى جۇرگىزۋشى گاگارين كوشەسىندە 11 جاستاعى قىزدى قاعىپ كەتتى. بالا ءۇرجار اۋدانىنىڭ ورتالىق اۋداندىق اۋرۋحاناسىندا قازا بولدى»، - دەپ حابارلادى اباي وبلىستىق پوليتسيا دەپارتامەنتىنەن.

قازىرگى ۋاقىتتا اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. Kazinform ءتىلشىسى اباي وبلىسىنىڭ باس يمامى اسقار مۇقانوۆقا حابارلاسىپ كوردى. ول جۇرگىزۋشىنىڭ يمام بولعانىن راستادى.

«ءۇرجار اۋىلدىق مەشىتىنىڭ يمامى ابايسىزدا جەكە كولىگىمەن جەتكىنشەكتى قاعىپ كەتكەن. ونىڭ ايتۋىنشا، ءبىر ءۇيدىڭ اۋلاسىندا بايلانىپ تۇرعان ءيتتىڭ ۇرگەنىنەن شوشىعان قىز جولعا جۇگىرىپ شىققان. سول كەزدە ءوزى 40-پەن كەلە جاتقان. كولىكتى توقتاتىپ ۇلگەرمەي قالىپتى. وقيعا بولعاننان كەيىن قىزدى دەرەۋ اۋرۋحاناعا ءوزى جەتكىزگەن. وكىنىشكە قاراي، باسىمەن اسفالتقا قۇلاعان بالا وتا ۇستىندە قازا بولدى. ءبۇلدىرشىننىڭ اتا-اناسى مەن تۋعان تۋىستارىنا قايعىلارىنا ورتاقتاسىپ كوڭىل ايتامىز. قارىنداسىمىزدىڭ وقىستان بولعان قازاسى ءبارىمىزدىڭ جۇرەگىمىزگە اۋىر باتىپ وتىر»، - دەدى ول.

يمامنىڭ ءۇرجار اۋىلدىق مەشىتىندە قىزمەت ەتىپ كەلە جاتقانىنا 10 جىلدان استام ۋاقىت بولىپتى.

«قىزمەت بارىسىندا ونىڭ قانداي دا ءبىر ءتارتىپ نەمەسە ەرەجە بۇزعان جاعدايلارى كەزدەسپەدى. بۇنداي وقىس وقيعا ءبىرىنشى رەت بولىپ وتىر»، - دەدى اسقار مۇقانوۆ.

ەسكە سالساق، وسىعان دەيىن وسكەمەندە جۇرگىزۋشى كۋالىگىنە ەمتيحان تاپسىرعانداردان 40 ميلليون تەڭگە سىياقى العان ح ق و قىزمەتكەرلەرى سوتتالعانى حابارلانعان.

اۆتور

تالعاتجان مۇحامەتبەك ۇلى