اباي مەدەت تۇتقان ءسايحالي كىم؟
پاۆلودار. KAZINFORM - قازاقتىڭ ۇلى اقىنى اباي قۇنانباي ۇلى مەدەت تۇتىپ، ولەڭدەرىن وقىعان شىعىس اقىنى سابىر ءسايحاليدىڭ 1905 -جىلى جارىق كورگەن ولەڭدەر جيناعى تانىستىرىلدى. تۋىندى 296 بەتتەن تۇرادى.
پاۆلوداردا شىعىس اقىنى سابىر ءسايحاليدىڭ 1905 -جىلى قازان قالاسىندا اراب گرافيكاسىندا جارىق كورگەن كونە كىتابى تانىستىرىلدى.
كىتاپتى قۇراستىرعان - يسمايل شامسۋدينوۆ. كىتاپتىڭ اتاۋى - «ديۋاني ءسايحالي». تۋىندى 296 بەتتەن تۇرادى. بۇل كىتاپتا ءدىني- تاريحي ۇزاق جىر جازىلعان. دۇنيەنىڭ جارالۋىنان باستاپ، 680 -جىلعى حۇسايىننىڭ كەربالا شولىندە سوعىسىپ ولگەنىنە دەينگى تاريح قامتىلعان. تاريحي جىردىڭ اۆتورى - شىعىس اقىنى سابىر ءسايحالي.
سابىر ءسايحاليدىڭ ەسىمى اباي ولەڭىندە اتالادى.
«فزۋلي، شامسي، ءسايحالي،
ناۋاي، ساعدي، فيرداۋسي،
قوجا حافيز بۋ حامماسي،
مادەت بەر، ءيا، شاعيري[1] فارياد[2]».
بەلگىلەنگەن سوزدەردىڭ تۇسىنىگى كەلەسىدەي:
[1] - شاعيري (ارابشا) - اقىن.
[2] - ءفارياد (پارسىشا) - تەڭدەسى جوق، اسىل.
دەمەك، اباي قۇنانباي ۇلى شىعىستىڭ تەڭدەسى جوق اقىندارىنان مەدەت سۇراعان بولسا، سول مەدەت (باتا) سۇراعان شىعىس اقىندارىنىڭ ءبىرى - ءسايحالي اقىن.
عالامتورداعى ۆيكيپەديا مالىمەتتەرىنە سۇيەنسەك، سابىر ءسايحالي 15-عاسىردا ءومىر سۇرگەن شىعىس اقىنى. «ديۋاني ءسايحالي» كىتابى 1332 -جىلى تاشكەنتتە، كەيىن قازان مەن ستامبۋل قالالارىنداعى باسپادان شىققان.
ولەڭدەر جيناعىنىڭ ءبىر نۇسقاسى پاۆلودار وبلىسىندا تابىلىپ وتىر. بۇل كىتاپتىڭ بىرنەشە نۇسقاسى الماتى وبلىسىنداعى ۇلتتىق كىتاپحانادا ساقتالسا، تاعى ءبىر نۇسقاسى اباي وبلىسىنداعى اباي مۋزەيىندە تۇر. اباي مۋزەيىنە قايىم مۇحامەدحانوۆ تاپسىرعان. سيرەك كىتاپ ابايدىڭ تۋعان كۇنىنە وراي، بۇقار جىراۋ اتىنداعى ادەبيەت جانە ونەر مۋزەيىندە كوپشىلىك قاۋىمعا تانىستىردى.
جادىگەردى پاۆلودار قالاسىنىڭ تۇرعىنى قاليپا ۇكەن قىزى تابىستادى.
بۇعان دەيىن پاۆلودارداعى مۋزەيدە اباي قۇنانباي ۇلىنىڭ 1909 -جىلى جارىق كورگەن تۇڭعىش جىر جيناعى ساقتالىپ تۇرعانى تۋرالى جازعان ەدىك.
اۆتور
مۇرات اياعان
