اباي ۇلتتىق مەكتەبى جاڭا عيماراتىنىڭ قازىعى قاعىلدى
استانا. KAZINFORM - پرەزيدەنتتىڭ تاپسىرماسىمەن اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتىنىڭ جاڭا عيماراتىنىڭ قۇرىلىسىن باستاۋ ءراسىمى ءوتتى، دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.
وعان قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ، وقۋ-اعارتۋ ءمينيسترى عاني بەيسەمبايەۆ، الماتى قالاسىنىڭ باسشىلىعى، «قازاقستاننىڭ ەڭبەك ەرلەرى» ا. ميرازوۆا، گ. نۇرپەيىسوۆا، ا. جۇمادىلدايەۆ، پارلامەنت جانە ءماسليحات دەپۋتاتتارى، ارداگەرلەر، زيالى قاۋىم مەن پەداگوگيكالىق قاۋىمداستىق وكىلدەرى قاتىستى.
سەنات سپيكەرى ماۋلەن اشىمبايەۆ ءوز سوزىندە اباي اتىنداعى مەكتەپتىڭ جاڭا عيماراتىن سالۋ ورتا ءبىلىمنىڭ ۇلتتىق برەندىن قالىپتاستىرۋعا قوسىلعان ۇلكەن ۇلەس ەكەنىن ايتتى.
سونداي-اق پالاتا ءتوراعاسى بۇل قادام قوعامدا ۇلتتىق مۇددەنى بەرىك ورنىقتىرۋ جانە تاريحي ساباقتاستىقتى ساقتاۋ ءۇشىن قاجەت ەكەنىنە نازار اۋداردى.
ەستەرىڭىزگە سالا كەتەيىك، مەملەكەت باسشىسى قاسىم-جومارت توقايەۆ 2020 -جىلى سەمەي وڭىرىندە ابايتانۋشى عالىمدارمەن كەزدەسۋىندە اباي اتىنداعى رەسپۋبليكالىق مەكتەپ-ينتەرناتىن زاماناۋي تالاپقا ساي جەتىلدىرىپ، ەڭ ۇزدىك ءبىلىم ورداسىنا اينالدىرۋ، گۋمانيتارلىق سالانى دامىتۋ، ونىڭ ىشىندە قازاق ءتىلى مەن ادەبيەتىن وقىتۋعا باسا ءمان بەرۋ تۋرالى تاپسىرما بەرگەن بولاتىن. وسى ماقساتتا بۇگىنگى تاڭدا اباي اتىنداعى رەسپۋبليكالىق قازاق ءتىلى مەن ادەبيەتىن تەرەڭدەتە وقىتاتىن مەكتەپ-ينتەرناتىن «اباي ۇلتتىق مەكتەبىنە» ترانسفورماتسيالاۋ تۇجىرىمداماسى جاسالۋدا.
سونداي-اق پرەزيدەنت باستاماسىمەن ەلىمىزدە گۋمانيتارلىق پاندەردى تەرەڭدەتىپ وقىتاتىن اباي اتىنداعى مەكتەپتەر مەن مەكتەپ-ينتەرناتتار جەلىسى دامۋدا. جاڭا عيماراتتىڭ العاشقى قازىعىن قاعۋ راسىمىندە ءسوز سويلەگەن وقۋ-اعارتۋ ءمينيسترى عاني بەيسەمبايەۆ اباي ۇلتتىق مەكتەبىنىڭ بولاشاقتا بارلىق مەكتەپتىڭ كوشىن باستايتىن ۇلگىلى ءبىلىم وشاعىنا اينالاتىنىنا سەنىم ءبىلدىردى.
«مەملەكەت باسشىسى انا ءتىلىمىز بەن ءتول ادەبيەتىمىزدىڭ قادىر-قاسيەتىن بالالارعا مەكتەپ جاسىنان باستاپ ءسىڭىرۋدى، بۇل باعىتتا ءبىرىڭعاي ۇستانىم ازىرلەۋدى تاپسىردى. اباي مەكتەپتەرى جەلىسى ءۇشىن ءبىرتۇتاس «ABAY- Programme» باعدارلاماسىن ازىرلەۋ قولعا الىندى. رەسپۋبليكالىق اباي مەكتەبىن ترانسفورماتسيالاۋ ارقىلى ءبىز ءتىل مەن ادەبيەتتى تەرەڭدەتىپ وقىتىپ قانا قويماي، ەلىمىزدىڭ بولاشاق ينتەللەكتۋالدى الەۋەتىن قالىپتاستىرۋعا قادام جاسايمىز. اباي ۇلتتىق مەكتەبى - مەملەكەت باسشىسىنىڭ «ادال ازامات» تۇجىرىمداماسى مەن ابايدىڭ «تولىق ادام» ىلىمىنەن تاعىلىم العان، زاماناۋي ءبىلىم بەرۋ كەڭىستىگىندە باسەكەگە قابىلەتتى، پاتريوت جاستاردىڭ كيەلى ءبىلىم ۇياسىنا اينالۋى ءتيىس»، - دەدى وقۋ-اعارتۋ ءمينيسترى عاني بەيسەمبايەۆ.
ايتا كەتەيىك، قۇرىلىسى باستالعان جاڭا عيمارات نىسانى 900 وقۋشى ورنىنا ارنالعان. ونىڭ ينفراقۇرىلىمىندا مەكتەپ-پانسيون، مۇعالىمدەر ءۇيى، كىتاپحانا، ABAY-arena سپورت كەشەنى، جىلىجاي اۋماقتارى جانە تاعى باسقا قۇرىلىس نىساندارى قاراستىرىلعان. ءبىلىم ۇيىمىن 2025 -جىلى قىركۇيەكتەن باستاپ قولدانىسقا بەرۋ جوسپارلانعان.
بۇعان دەيىن مينيسترلىك تاربيەشىلەردىڭ ورتاشا ايلىعى قانشا تەڭگە كولەمىندە ەكەنىن ايتقان بولاتىن.
اۆتور
اينۇر تۋماكبايەۆا
