ا ق ش يران مۇددەسىنە قارجى جىمقىرۋعا بايلانىستى 10 جەكە تۇلعا مەن 27 كومپانياعا سانكسيا ەنگىزدى
استانا. KAZINFORM - شەكتەۋ شارالارى يراننىڭ توعىز جانە قىتايدىڭ ءبىر ازاماتىنا قاتىستى قابىلداندى، دەپ حابارلايدى تاسس.
امەريكا قۇراما شتاتتارى يران بيلىگىنىڭ مۇددەسى ءۇشىن قارجى جىمقىرۋعا قارسى كۇرەس سىلتاۋىمەن 10 جەكە جانە 27 زاڭدى تۇلعاعا سانكسيا ەنگىزدى. بۇل تۋرالى ا ق ش مەملەكەتتىك دەپارتامەنتىنىڭ باسپا ءسوز قىزمەتى تاراتقان مالىمدەمەدە ايتىلدى.
ا ق ش بيلىگىنىڭ مالىمەتىنشە، سانكسياعا ىلىككەن كومپانيالار مەن جەكە تۇلعالار بىرنەشە ميلليارد دوللاردى جىمقىرۋعا مۇمكىندىك بەرگەن سىزباعا قاتىسقان. بۇل ارەكەت «ا ق ش- تىڭ سانكسيالارىنان اينالىپ ءوتىپ، مۇناي مەن وزگە دە تاۋارلاردى ساتۋ ارقىلى» جۇزەگە اسىرىلعان دەپ كورسەتىلگەن.
ا ق ش قارجى مينيسترلىگىنىڭ شەتەلدىك اكتيۆتەردى باقىلاۋ باسقارماسىنىڭ سايتىندا جاريالانعان مالىمەتكە سايكەس، شەكتەۋ شارالارى يراننىڭ توعىز جانە قىتايدىڭ ءبىر ازاماتىنا قاتىستى قولدانىلعان. سونىمەن قاتار، شەكتەۋ تىزىمىنە ەنگەن 27 كومپانيانىڭ 17- ءسى گونكونگتە، 5-ەۋى بىرىككەن اراب امىرلىكتەرىندە جانە 5-ەۋى يراندا تىركەلگەن.
سانكسيالىق تىزىمگە ەنگىزىلۋ ا ق ش- تاعى اكتيۆتەردىڭ بۇعاتتالۋىن جانە امەريكالىق ازاماتتار مەن كومپانيالارعا اتالعان تۇلعالارمەن ىسكەرلىك قاتىناس ورناتۋعا تىيىم سالىنۋىن بىلدىرەدى.
ايتا كەتەلىك يران سانكسيالاردى قايتارۋ تەتىگى ىسكە قوسىلعان جاعدايدا «قاتاڭ جاۋاپ» قايتارۋعا ۋادە ەتكەن ەدى.
