ا ق ش- تا ورمان ءورتى مەن بوراننان 12 ادام قايتىس بولدى

استانا. KAZINFORM – امەريكا قۇراما شتاتتارىندا تابيعات توسىن مىنەز كورسەتىپ، ەلدىڭ شىعىسى كەيىنگى 10 جىلدا بولماعان قار قۇرساۋىندا قالسا، باتىسىندا ورمان ءورتى دەس بەرمەي تۇر.

لوس-اندجەلەس وكرۋگىنىڭ شەريف دەپارتامەنتىنىڭ مالىمدەۋىنشە يتون ورتىنەن بەس ادام اجال قۇشقان. ال كانزاس، ميسسۋري، يللينويس شتاتتارىنداعى قارلى بوراننان 7 ادام وپات بولدى. جىلدامدىعى ساعاتىنا 160 شاقىرىمعا جەتەتىن جەل، قۇرعاعان اعاشتار، سوڭعى ايلارداعى جاۋىن شاشىننىڭ از ءتۇسۋى كاليفورنيادا جىلدا قايتالاناتىن ورمان ءورتىن بيىل تىپتەن ءورشىتىپ جىبەردى.

جاھاندىق جىلىنۋمەن ەسەلەنە تۇسكەن ءتىلسىز جاۋ وسى جولى شتاتتىڭ 6 بىردەي ايماعىندا 11 مىڭ گەكتاردان استام جەردى كۇلگە اينالدىرىپ ۇلگەردى. 160 مىڭ ادام ەۆاكۋاتسيالانعانىمەن، ءورتتى اۋىزدىقتاۋ ازىرگە مۇمكىن بولماي تۇر.

ەنتوني مارروۋن، لوس-انجەلەس وكرۋگىنىڭ ءورت ءسوندىرۋ دەپارتامەنتى باسشىسى:

- وڭىردەگى ءورتتى ءسوندىرۋ ءۇشىن لوس-انجەلەس قالاسىمەن بىرگە كاليفورنيا شتاتىنىڭ ءورت ءسوندىرۋ قۇرىلىمدارى تۇگەل جۇمىلدىرىلدى. قازىر لاۋلاعان جالىنمەن 500-دەن اسا ءورت ءسوندىرۋشى كۇرەسىپ جاتىر. ءبىراق ءتىلسىز جاۋدى ءالى اۋىزدىقتاي الماي وتىرمىز. 1000-نان اسا عيمارات جانىپ كەتتى.

جومارت سمات، تۇرعىن:

- بىزگە تۇنىمەنەن توتەنشە جاعداي قىزمەتكەرلەرىنەن س م س- حابارلامالار ءتۇسىپ جاتىر. ءورت وسى لوس- انجەلەس قالاسىنىڭ شەتىندە ورنالاسقان سانتا- مونيكا، پلاسەنتيا، پلاسادينا اۋداندارىنا جەتكەن. ۇيلەر ورتەنىپ، سول ورماننان قاشقان جابايى اڭدار ەلدى مەكەندەردىڭ ىشىندە ءجۇر دەگەن اقپاراتتار بار.

كيۋرتيس، تۇرعىن:

- جاعدايىمىز وتە قيىن. قولدا بار مۇلكىمىزدىڭ بارىننەن ايىرىلدىق. جالعىز مەن عانا ەمەس، وسى اۋداننىڭ بارلىق تۇرعىنى قاتتى زارداپ شەكتى. ءدال مۇنداي اپاتتى لوس-انجەلەس بۇرىن سوڭدى كورمەگەن.

وسىنداي قيىن ساتتە جاپا شەككەن تۇرعىندارعا قولدۋ كورسەتۋ ءۇشىن ەل پرەزيدەنتى دجو بايدەن دە وڭىرگە كەلدى. فەدەرالدى ۇكىمەت زالال كەلگەن دۇنيەلەردى قالپىنا كەلتىرۋ ءۇشىن بار كۇشىن سالاتىنىن ايتىپ، حالىقتى شىدامدى بولۋعا شاقىردى. ال ساراپشىلاردىڭ ايتۋىنشا جەل باسىلماي ءورتتى اۋىزدىقتاۋ مۇمكىن ەمەس.

ليندون پرونتو، ەۋروپا ورمان ينستيتۋتىنىڭ ورتپەن كۇرەستى باسقارۋ سالاسى بويىنشا اعا ساراپشى:

- ەڭ قيىنى سانتا انا جەلىنىڭ اسەرى بولىپ وتىر. ول قۇرلىقتان مۇحيتقا قاراي سوققاندىقتان بۇلتتاردى ايداپ، ىلعال بولماي وسىمدىكتىڭ ءبارى قۇرعاپ، تەز تۇتانعىش بولىپ تۇر. بۇعان جاھاندىق جىلىنۋدىڭ اسەرىن قوسىڭىز. سەبەبى 1980 -جىلداردان بەرى كاليفورنياداعى قۇرعاق ماۋسىم ۋاقىتى ەكى ەسە سوزىلىپ كەتكەن.

لوس-اندجەلەس ماڭىنداعى ورمان ورتىنەن قازىردىڭ وزىندە 57 ميلليارد دوللار شىعىن كەلدى.

كاليفورنيا جۇرتى وسىلاي الاپات ورتپەن ارپالىسىپ جاتسا ەلدىڭ ورتالىعىنان شىعىسىنا قاراي قار بورانى كۇشەيىپ، 200 مىڭنان استام تۇرعىن قۋات كوزىنسىز قالدى. جاپالاقتاپ جاۋعان قار مەن كوكتايعاققا بايلانىستى كەي شتاتتاردا توتەنشە جاعداي جاريالاندى. كانزاستاعى اۋەجاي جۇمىسى كىدىرىپ، جول كولىك قوزعالىسى قيىندادى. ۆاشينگتون قالاسىندا مەكتەپتەر جابىلىپ، ازاماتتاردىڭ ءبىرازى قاشىقتان جۇمىس ىستەۋگە اۋىسقان. ال مەتەورولوگتار وسى اپتانىڭ اياعىندا ا ق ش- تىڭ ورتالىعى مەن شىعىس جاعالاۋىندا بوران كۇشەيە تۇسەدى دەپ بولجاپ وتىر.

24.kz