ا ق ش قورعانىس مينيسترلىگى گەنەرالدار مەن ادميرالدار سانىن 20 پايىزعا قىسقارتادى

ۆاشينگتون. KAZINFORM - ا ق ش قورعانىس مينيسترلىگى قارۋلى كۇشتەردىڭ قۇرىلىمىن وڭتايلاندىرۋ جانە جەدەل تيىمدىلىكتى ارتتىرۋ ماقساتىندا گەنەرالدار مەن ادميرالدار سانىن %20 عا قىسقارتۋ تۋرالى شەشىم قابىلدادى. بۇل تۋرالى انادولى جازدى.

مينيسترلىك تاراتقان مالىمدەمەدە ارميانىڭ قابىلەتى مەن جاۋىنگەرلىك دايىندىعىن ساقتاۋ ءۇشىن اسكەري باسشىلىق قۇرىلىمىن جەڭىلدەتۋ قاجەت ەكەنى اتاپ وتىلگەن.

- بۇل شارالار اسكەري باسقارۋ جۇيەسىن يكەمدىرەك ءارى زاماناۋي ەتۋگە باعىتتالعان. جاڭا جۇيە بيۋروكراتيالىق ەمەس، كەرىسىنشە يننوۆاتسيانى قولداۋعا جانە جەدەل جەتىلدىرۋگە نەگىزدەلەدى، - دەلىنگەن مالىمدەمەدە.

اتاپ ايتقاندا، ءتورت جۇلدىزدى گەنەرالدار مەن ادميرالداردىڭ سانى كەم دەگەندە %20- عا قىسقارادى. سونىمەن قاتار بۇل قىسقارتۋ ۇلتتىق گۆارديا قۇرامىندا قىزمەت ەتەتىن جوعارى شەندى وفيتسەرلەرگە دە اسەر ەتەدى.

- بۇل قادام قابىلدانعان سوڭ قورعانىس قۇرىلىمى بۇرىنعىدان دا موبيلدى جانە ءتيىمدى بولادى. وسى شارالار ارقىلى ءبىز الەمدەگى ەڭ قۋاتتى جاۋىنگەرلىك كۇش بولىپ قالا بەرەمىز، بەيبىتشىلىكتى كۇش ارقىلى نىعايتىپ، تيىمدىلىك، جاڭاشىلدىق جانە دايارلىق دەڭگەيىن ارتتىرامىز، - دەپ قورىتىندىلادى ۆەدومستۆو.

ايتا كەتەيىك، بۇعان دەيىن 2026 -جىلى ا ق ش اسكەري شىعىندارىن 1,01 تريلليون دوللارعا ۇلعايتۋعا نيەتتى ەكەنىن جازدىق.

سونداي-اق، ا ق ش شىعىس ەۋروپاداعى 6000 ساربازىن الماستىرادى.

اۆتور

جاراسقان نۇرىبايەۆ