ن. نازاربايەۆ پەن ا. مەركەل 9- قاڭتار كۇنى بەرليندە ۋكراينا ماسەلەسى بويىنشا كەلىسسوزدەر جۇرگىزەدى
بۇل تۋرالى Deutsche Welle حابارلادى.
كەزدەسۋ بارىسىندا ۋكراينادا قالىپتاسقان جاعدايدى شەشۋ ماسەلەسى تالقىلانادى. سونداي-اق، قاڭتار ايىنىڭ ورتاسىندا وسى تاقىرىپ بويىنشا «نورماند فورماتىندا» كەلىسسوز وتكىزۋگە دايىندىق ماسەلەسى دە قارالادى، دەپ حابارلايدى گ ف ر ۇكىمەتىنىڭ رەسمي وكىلى شتەففەن زايبەرت.
ءبىراق، dpa اگەنتتىگىنىڭ حابارلاۋىنشا، زايبەرت 15- قاڭتاردا استانادا كەلىسسوز وتەتىنى جايلى ەشتەڭە ايتپاعان.
«مەن ازىرشە بۇنداي كەزدەسۋدىڭ بولاتىنى جانە ونىڭ قاشان وتەتىنى تۋرالى ەشتەڭە ايتا المايمىن. باستىسى، سول كەزدەسۋدە ناقتى كەلىسىمدەرگە قول جەتكىزىلسە بولعانى»، - دەيدى ول.
ەلباسىنىڭ ا. مەركەلمەن كەزدەسۋىمەن ءبىر ۋاقىتتا رەسەي، ۋكراينا، فرانسيا جانە گەرمانيا ەلدەرىنىڭ سىرتقى ىستەر مينيسترلەرىنىڭ تەلەفون كونفەرەنتسياسى وتپەك، دەيدى اگەنتتىك حابارلاماسىندا.
سونداي-اق، الداعى اپتانىڭ باسىندا اتالعان ەلدەردىڭ سىرتقى ىستەر مينيسترلەرى دەڭگەيىندە جيىن ءوتۋى مۇمكىن. وندا قازاقستان استاناسىندا ءوتۋى ىقتيمال كەزدەسۋ جايى دا تالقىلانباق.
