وتاندىق جيھاز ماتەريالدارىنىڭ 90 پايىزى يمپورتقا تاۋەلدى - كاسىپكەر
بۇل تۋرالى قازاقستاننىڭ جيھاز جانە اعاش وڭدەۋ ونەركاسىبى كاسىپورىندارى قاۋىمداستىعىنىڭ پرەزيدەنتى قانات يبرايەۆ ءمالىم ەتتى، دەپ حابارلايدى قازاقپارات ءتىلشىسى.
«پاندەمياعا دەيىن 2019-جىلمەن سالىستىرعاندا جيھاز ماتەريالدارىنىڭ باعاسى 2-3 ەسەگە وسكەن. ال كەيبىر ماتەريالدار 35 پايىز - 40 پايىزعا دەيىن قىمباتتادى. مىسالى، بۇرىن جيھاز تاقتايشاسىنىڭ باعاسى 6-7 مىڭ تەڭگە تۇرسا، قازىر ول 16-18 مىڭعا جەتىپ وتىر. بۇل بۇكىل قازاقستان بويىنشا. سونىمەن قاتار فۋرنيتۋرا باعاسىنىڭ توقسان سايىن وسكەنىن بايقاپ وتىرمىز. قازاقستاندىق جيھاز ماتەريالدارىنىڭ 90 پايىزى يمپورتقا تاۋەلدى»، - دەدى قانات يبرايەۆ نۇر-سۇلتان قالاسى كاسىپكەرلەر پالاتاسى وڭىرلىك كەڭەسىنىڭ ەسەپتىك كەزدەسۋىندە.
ونىڭ ايتۋىنشا، پاندەميا كەزىندە رەسەي پليتا ماتەريالىن ەكسپورتتاۋعا تىيىم سالدى.
«بۇل كۇتپەگەن جاعداي بولدى. سوڭى باعانىڭ وسۋىنە الىپ كەلدى. ەسەسىنە رەسەي ىشكى نارىعىن قامتاماسىز ەتتى. پاندەمياعا قاتىستى الاساپىراننان رەسەيدىڭ وزىندە دە تاپشىلىق بولدى. ال قازاقستانعا ماتەريالدىڭ 96 پايىزى وسى ەل ارقىلى كەلەدى. ءبىز ماسەلەنى مەملەكەتتىك ورگاندار دەڭگەيىندە كوتەردىك. ساۋدا جانە ينتەگراتسيا، يندۋستريا جانە ينفراقۇرىلىمدىق دامۋ مينيسترلىكتەرى ۋاقىتىلى قولداۋ كورسەتتى. ماسەلەنى شەشۋ ءۇشىن بولىنەتىن كۆوتانىڭ كولەمىن ارتتىردى. بۇگىندە ماتەريال تاپشىلىعى جوق»، - دەيدى ول.
بۇعان دەيىن قوستانايدا 300 جۇك كولىگىنىڭ جۇرگىزۋشىسى جۇمىسسىز قالعانىن حابارلاعان ەدىك.
ايتا كەتەيىك، بۇگىن نۇر-سۇلتان قالاسى كاسىپكەرلەر پالاتاسىنىڭ وڭىرلىك كەڭەسىنىڭ وتىرىسى ءوتتى. اتالعان جيىندا شەتەل ينۆەستورلارىنىڭ قازاقستان نارىعىنا اسا قىزىعۋشىلىق تانىتىپ وتىرعانى ايتىلدى.
