ت. تولەشيەۆ بيلىكتى باسىپ الۋ ءۇشىن 90 قارۋلى اسكەر دايىنداعان
بۇل تۋرالى بۇگىن ۇلتتىق قاۋىپسىزدىك كوميتەتى باسپا ءسوز قىزمەتىنىڭ وكىلى رۋسلان قاراسيەۆ ءمالىم ەتتى.
رۋسلان قاراسيەۆتىڭ ايتۋىنشا، تولەشيەۆ وزىمەن سىبايلاس ترانسۇلتتىق قىلمىستىق توپتاردىڭ قاتىسۋىمەن شىمكەنت اۋماعىندا بىرنەشە رەت جيىن وتكىزگەن. ولارعا جيىن وتكىزىپ بەرگەن ت. تولەشيەۆ وڭتۇستىك قازاقستان وبلىسىنىڭ قىلمىستىق توپتارى اراسىندا بەدەل جيناپ، كريمينالدى ماسەلەلەردى «رەتتەگەنى» ءۇشىن اقشا الىپ وتىرعان.
«تەرگەۋ انىقتاعانداي، قىلمىستىق امبيتسياسىن جۇزەگە اسىرىپ، بەدەلىن ارتتىرا ءتۇسۋ ءۇشىن ت. تولەشيەۆ ءوز كاسىپورىندارىنىڭ كۇزەت قىزمەتى بازاسىندا ءوزىنىڭ ۇيىمداسقان قىلمىستىق توبىن قۇرىپ، قارۋمەن جاراقتاندىرعان. ت. تولەشيەۆتىڭ يەلىگىندە ساقاداي- ساي 90 اسكەرى بار بولعان» ، - دەدى ر. قاراسيەۆ.
ونىڭ ايتۋىنشا، ت. تولەشيەۆ ءوزىنىڭ بۇل ارەكەتتەرىنە سىرتتاي زاڭدى كورىنىس بەرۋ ءۇشىن الدىمەن «سمەرش» ، كەيىننەن «ۆىمپەل گرۋپپ» اتتى كۇزەت فيرماسىن تىركەگەن.
اۆتور: كەنجەكەي توقتامۇرات قىزى