ەلىمىزدە ءاربىر 90 سەكۋند سايىن دۇنيە ەسىگىن جاڭادان اشقان ءسابيدىڭ ىڭگالاعان داۋىسى ەستىلەدى - مەملەكەت باسشىسى

 بۇل تۋرالى بۇگىن «مەرەيلى وتباسى» ۇلتتىق بايقاۋىنىڭ جەڭىمپازدارىن ماراپاتتاۋعا ارنالعان سالتاناتتى شارا بارىسىندا ەلباسى نۇرسۇلتان نازاربايەۆ ايتتى.

ەلىمىزدە جۇرگىزىلىپ جاتقان ساياساتتىڭ دەموگرافيالىق احۋالعا وڭ سەپتىگىن تيگىزىپ وتىرعانىن باسا ايتقان مەملەكەت باسشىسى: «تاۋەلسىزدىك كەزىندە، بيىل وعان 23 جىل تولادى، 6 ميلليوننان استام ءسابي دۇنيەگە كەلدى. سوۆەت وداعى كۇيرەپ، حالىمىز مۇشكىل بولعان جاعدايدا حالقىمىزدىڭ سانى 14 ميلليونعا دەيىن تومەندەپ كەتكەنىن بىلەسىزدەر. وسى جىلداردىڭ وزىندە، قازىر ەلىمىزدىڭ حالقىنىڭ سانىن 17 ميلليوننان ارتىق بولدى. وتكەن 1  جىلدىڭ ىشىندە 254 مىڭ ادامعا كوبەيدىك. سالىستىرۋ ءۇشىن ايتار بولساق، بۇل تۇتاس قوستاناي قالاسىنىڭ حالقى بولىپ سانالادى. ستاتيستيكا بويىنشا ەلىمىزدە ءاربىر 90 سەكۋند سايىن دۇنيە ەسىگىن جاڭادان اشقان ءسابيدىڭ ىڭگالاعان داۋىسى ەستىلەدى»، - دەدى.

ەلباسىنىڭ اتاپ وتۋىنشە، سوندىقتان دا 20  جىل ىشىندە ەلىمىزدە 1000 ءبىلىم ورداسى، 800 دەنساۋلىق نىسانى سالىنعان. بۇل حالقىمىزدىڭ يگىلىگىنە جاسالعان مەملەكەتتىڭ قامقورلىعى بولىپ سانالادى.

 «بۇرىن- سوڭدى قازاقستاندا ەشقاشان بولماعان كۇردەلى وپەراتسيالار جاسالاتىن بولدى. سونىڭ ناتيجەسىندە ەل ازاماتتارىنىڭ ورتاشا ءومىر ءسۇرۋ ۇزاقتىعى 70 جاستان استى» ، - دەدى ق ر پرەزيدەنتى.

ايتا كەتەيىك، ماراپاتتاۋ راسىمىنە ايماقتىق تۋرلاردان جەڭىپ شىققان 16 وتباسى قاتىسادى. جالپى، كونكۋرستا ەلىمىزدىڭ بارلىق وڭىرلەرىنەن  1298 وتباسى باق سىناعان بولاتىن.

 اۆتور: مارلان جيەمباي