ۇستالعانداردى تەرگەۋدە رۇقسات ەتىلمەگەن ءادىس قولدانعان ۇ ق ك- نىڭ 8 قىزمەتكەرى قامالدى
بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.
«تەرگەۋ جۇرگىزۋ بارىسىندا ازاماتتاردىڭ قۇقىقتارىنىڭ ساقتالۋىنا جانە زاڭدىلىقتى قامتاماسىز ەتۋگە ەرەكشە نازار اۋدارىلعان. تەرگەۋدىڭ رۇقسات ەتىلمەگەن ادىستەرى بويىنشا سوتقا دەيىنگى تەرگەپ- تەكسەرۋ ءجۇرىپ جاتىر. ارنايى پروكۋرورلار ەڭ رەزونانستى 10 جاعدايدى تەرگەۋدە. اتالعان ىستەر بويىنشا ارنايى پروكۋرورلار 9 لاۋازىمدى ادامدى ۇستادى. ونىڭ ىشىندە 8 ۇلتتىق قاۋىپسىزدىك قىزمەتكەرى مەن 1 پوليتسيا وكىلى بار»، - دەدى ق ر باس پروكۋراتۋراسى 1-قىزمەت باستىعىنىڭ ورىنباسارى.
سونداي- اق، ول ءدال قازىر قاماۋدا وتىرعان كۇدىكتىلەردىڭ ەشبىرىنە تەرگەۋدىڭ رۇقسات ەتىلمەگەن تاسىلدەرى قولدانىلىپ جاتپاعانىن رەسمي مالىمدەدى.
«الەۋمەتتىك جەلىدە قاماۋدا وتىرعاندارعا قاتىستى تەرگەۋدىڭ رۇقسات ەتىلمەگەن ادىستەرىن قولدانۋ جالعاسىپ جاتقانى تۋرالى جازبالار جاريالانىپ جاتىر. اتالعان ادامدارعا قاتىستى ەشقانداي زورلىق- زومبىلىق قولدانىلىپ جاتپاعانىن سەندىرىپ ايتامىز. بۇل رەتتە ءبىز بۇرىن قولدانىلعان بۇلتارتپاۋ شارالارىن جەڭىلدەتۋ جونىندەگى جۇمىستاردى جالعاستىرىپ جاتىرمىز. پروكۋرورلار ۇستالعان جانە كۇدىكتى ادامداردىڭ تۋىستارىمەن كەزدەسۋ وتكىزەدى. ولاردىڭ دالەلدەرىن مۇقيات تەكسەرە جانە وسىنى ەسكەرە وتىرىپ، بۇلتارتپاۋ شارالارىن وزگەرتۋ تۋرالى شەشىم قابىلدايدى. جەكە باسىن، دەنساۋلىق جاعدايىن جانە باسقا دا سيپاتتاردى ەسكەرە وتىرىپ، 275 ادامنىڭ قاماۋدا ۇستاۋ تۇرىندەگى بۇلتارتپاۋ شاراسى ەشقايدا كەتپەۋ تۋرالى قولحاتقا، كەپىلگە، ءۇيقاماققا الۋعا جانە جەكەكەپىلگەرلىككە اۋىستىرىلدى»، - دەدى ەلدوس قيلىمجانوۆ.
اۆتور: ەسىمجان ناقتىباي
