قورداي وقيعاسى: قىرعىزستانعا ءوتىپ كەتكەن 8 مىڭ ادام ەلگە ورالدى
بۇل تۋرالى ۇكىمەت وتىرىسىندا جامبىل وبلىسىنىڭ اكىمى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
«قازىرگى تاڭدا كوميسسيا ورتەنگەن ۇيلەردى، ساۋدا نىساندارىن جەرگىلىكتى حالىقتىڭ كومەگىمەن قوسىمشا تەكسەرىپ جاتىرمىز. وسى ءبىر-ەكى كۇندە ولاردىڭ ناقتى سانىن، ودان كەيىن قانداي كومەك كەرەگىن ايتامىز، ۇسىنىس جاسايمىز. ءبىز وسى ءۇش كۇندە بارلىق 5 ەلدى مەكەندە حالىقپەن كەزدەستىك. ولارعا قانداي قولداۋ بولاتىنىن تۇسىندىردىك. جالپى حالىق ءبارىن دۇرىس ءتۇسىنىپ وتىر»، - دەدى ءوڭىر باسشىسى.
سونىمەن قاتار، ول كەلەشەكتە وسىنداي جاعدايلار قايتالانباس ءۇشىن كەشە ەلدى مەكەندەردىڭ بەلسەندى، ابرويلى ازاماتتارىمەن كەزدەسىپ، تاعى دا سويلەسكەندەرىن اتاپ ءوتتى.
«وزدەرىڭىز باسپا سوزدەن بىلەسىزدەر، سوڭعى 3 كۇندە كوپتەگەن ازامات كورشى قىرعىزستان ەلىنە ءوتىپ كەتتى. وسى ەكى كۇننىڭ ىشىندە 8 مىڭعا جۋىق ازامات قايتارىلدى. كەشەدەن باستاپ بارلىق مەكتەپ، بالاباقشا بۇرىنعىداي ءوز جۇمىسىن جاساپ جاتىر. ساۋدا دۇكەندەرى دە جۇمىسىن باستادى»، - دەدى بەردىبەك ساپاربايەۆ.
جامبىل وبلىسىنىڭ اكىمى ورتكەنگەن ۇيلەردىڭ، دۇكەندەردىڭ قۇرىلىستارىن سالعان كەزدە جەرگىلىكتى قۇرىلىس كومپانياسى تارتىلاتىندىعىن باسا ايتتى.
«جەرگىلىكتى تۇرعىنداردى دا تارتامىز. سونىمەن قاتار سول ەلدى مەكەندەردەن شىققان كاسىپكەرلەرمەن جۇمىس ىستەپ جاتىرمىز. ولار وزدەرى دە كومەكتەرىن ۇسىنۋدا. جالپى، بارلىق ماسەلە باقىلاۋدا، قالپىنا كەلەدى دەپ ويلايمىز. ارينە، كەمشلىكتەر دە بار. ونى الداعى ۋاقىتتا جوندەيمىز»، - دەدى ول.
ءوز كەزەگىندە، ق ر پرەمەر-ءمينيسترى اسقار مامين ۇكىمەتتىك كوميسسيا جۇمىسىن جالعاستىرۋدى تاپسىردى.
«ۇكىمەت تاراپىنان قاجەتتى كومەك كورسەتىلەتىن بولادى»، - دەدى ۇكىمەت باسشىسى.
ەسكە سالايىق، 7- اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم-جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.
سونداي-اق ۆيتسە- پرەمەر بەردىبەك ساپاربايەۆتىڭ توراعالىعىمەن ۇكىمەتتىك كوميسسيا قۇرىلاتىنىن، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارى ۇيىمداستىرىلاتىنىن، قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىنىن ءمالىم ەتتى. باس پروكۋراتۋراعا، ۇلتتىق قاۋىپسىزدىك كوميتەتىنە ءتيىستى تاپسىرما بەرىلدى.
