قازاقستاننىڭ مەديتسينا ۇيىمدارىنىڭ كرەديتتىك قارىزى 87 ميلليارد تەڭگەنى قۇرايدى

اتالعان قوردىڭ مالىمەتىنشە، بۇگىنگى تاڭدا كرەديتورلىق بەرەشەك بارلىق وڭىرلەر ءۇشىن ورتاق وزەكتى ماسەلە. جالپى قازاقستان بويىنشا بورىشتىق جۇكتەمە شامامەن 87 ميلليارد تەڭگەنى قۇرايدى. ونىڭ 4,4 ميلليارد تەڭگەسى قىزىلوردا وبلىسىنىڭ 20 مەملەكەتتىك مەديتسينالىق ۇيىمىنا تيەسىلى.
اتالعان وبلىسقا ساپارمەن بارىپ، وڭىردەگى مەديتسينالىق ۇيىمداردىڭ باس دارىگەرلەرىمەن كەزدەسكەن الەۋمەتتىك مەديتسينالىق ساقتاندىرۋ قورىنىڭ باسشىسى ءسابيت احمەتوۆتىڭ ايتۋىنشا، بۇل ماسەلەنى شەشۋ قوردىڭ تىكەلەي قۇزىرىنا كىرمەيدى. ءبىراق ءا م س ق- نىڭ تاراپىنان كومەك كورسەتىلەدى. شىلدە ايىنىڭ سوڭىنا دەيىن بارلىق وڭىرلەرگە شامامەن 60 ميلليارد تەڭگە قوسىمشا قارجى ءبولۋ جوسپارلانعان. ونىڭ 5,2 ميلليارد تەڭگەسى مەديتسينالىق ۇيىمدار اراسىندا ءبولۋ ءۇشىن قوردىڭ قىزىلوردا وبلىسىنداعى فيليالىنا جىبەرىلەدى.
قور باسشىسىنىڭ سوزىنە قاراعاندا، دەنساۋلىق ساقتاۋ مينيسترلىگى قازىردىڭ وزىندە اۋقىمدى جۇمىستار اتقارۋدا. اتاپ ايتقاندا، eDensaulyq ءبىرىڭعاي پلاتفورماسى دايىندالىپ جاتىر. ول 2024-جىلدىڭ قاڭتارىنا دەيىن ىسكە قوسىلۋى ءتيىس. سونداي-اق مەديتسينالىق كومەكتىڭ اسا ماڭىزدى باعىتتارىنىڭ جەكەلەگەن تۇرلەرى بويىنشا تاريفتەردى قايتا قاراۋ جوسپارلانعان.
بۇعان دەيىن ەلىمىزدە مەديتسينالىق قىزمەتتەردىڭ ءتاريفى قايتا قارالاتىنىن جازعان ەدىك.
سونداي-اق قوستاناي وبلىسىنىڭ دەنساۋلىق ساقتاۋ باسقارماسى وڭىردەگى دەنساۋلىق نىساندارىنىڭ كرەديتورلىق جوعارى بەرەشەگىنە بايلانىستى وبلىس باسشىسى قۇمار اقساقالوۆتان قوسىمشا قارجى ءبولۋدى سۇراعان بولاتىن.