بيىل قازاقستاندا 850 مىڭ توننا ديزەل وتىنىنىڭ تاپشىلىعى بولۋى مۇمكىن
«كورشى ەلدەردەگى جاعداي قازاقستاننىڭ ىشكى نارىعىنا دا اسەر ەتىپ وتىرادى. ماسەلەن، بىلتىر ناۋرىزىندا رەسەيدەگى بولشەك ساۋداداعى ديزەل وتىنىنىڭ باعاسى قازاقستانداعى باعامەن تەڭەسىپ، ديزەل ارزانداعان بولاتىن. وسى ورايدا رەسەيمەن شەكارالاس جانارماي قۇيۋ ستانتسيالارىندا وتىندى ساتۋ كولەمى ازايعانىن بايقادىق. دەمەك، قازاقستاننان جانارماي شىعارۋ ەكونوميكالىق ءتيىمسىز بولدى. الايدا، ءبىر ايدان كەيىن كورشى ەلدەردەگى باعا كۇرت كوتەرىلگەن كەزدە، ءبىز ديزەل ءوندىرۋ كولەمىن ارتتىرساق تا، كۇز ايلارىندا ونىڭ تاپشىلىعىن قايتا كوردىك»، - دەدى ب. اقشولاقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، بيىل دا كورشى ەلدەرمەن سالىستىرعاندا وتىن بويىنشا باعا ايىرماشىلىعى ساقتالىپ وتىر.
«بۇل جاعداي ساقتالا بەرسە، ونسىز دا شەتەل اسىپ وتىرعان قازاقستان ديزەلىنىڭ كولەمى ارتا ءتۇسىپ، بيىلدىڭ وزىندە 850 مىڭ توننا تاپشىلىققا تاپ بولۋىمىز مۇمكىن. بۇعان دەيىن تاپشىلىقتى ءوندىرۋ كولەمىن ارتتىرۋ ارقىلى جاۋىپ وتىرساق، ءقازىر وتاندىق مۇناي وڭدەۋ زاۋىتتارى ەڭ جوعارى قۋىتىندا جۇمىس جاساپ تۇر. الداعى 6 جىلدا ديزەل كولەمىن بىرنەشە ەسە ارتتىراتىن مۇمكىندىك جوق (شىمكەنت زاۋىتىن كەڭەيتكەنشە). اتالعان سەبەپتەرگە بايلانىستى قازاقستان ارزان وتىنمەن باسقا ەلدەردىڭ ەكونوميكاسىن سۋبسيديالاندىرىپ، ۇلتتىق مۇددە تۇرعىسىندا شىعىن كەلىپ جاتىر دەپ ايتۋعا تولىق نەگىز بار»، - دەدى ءمينيستردىڭ مىندەتىن اتقارۋشى.
بۇدان بۇرىن حابارلانعانداي، قازاقستاندا بەنزين مەن ديزەل وتىنىنىڭ باعاسى وسەدى.
ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ەلىمىزدە جانارماي باعاسىنىڭ وسۋىنە قانداي سەبەپتەر اسەر ەتىپ وتىرعانىن ايتتى.
