جىل باسىنان پويىز بيلەتىنىڭ قۇنى 7 پايىزعا قىمباتتاعان

استانا. قازاقپارات – ب ا ق وكىلدەرىنىڭ ساۋالىنا جاۋاپ بەرگەن «قازاقستان تەمىر جولى» ۇ ق باسقارما ءتوراعاسىنىڭ ورىنباسارى قانات الماعامبەتوۆ «تالگو» پويىزدارىنىڭ بيلەت قۇنى نەگە قىمبات ەكەنىن ءتۇسىندىردى، دەپ حابارلايدى قازاقپارات ءتىلشىسى.

«تالگو ۆاگوندارى قاراپايىم پويىزدارعا قاراعاندا جايلى. «تالگوعا» ەكى ديزەلدى ۆاگون قىزمەت كورسەتەدى. ولار بۇكىل قۇرامدى سۋمەن، جارىقپەن جانە جىلۋمەن قامتاماسىز ەتەدى. ول ءۇشىن وعان 2 تونناعا دەيىن ديزەل وتىنى ساتىپ الىنادى. ءبىز ءار رەيستى جابدىقتايمىز. قىمباتشىلىقتىڭ سەبەبى - ديزەل وتىنىنىڭ قىمباتتىعى مەن «تالگو» كومپانياسىنىڭ ۆاگوندارىنا كورسەتىلەتىن سەرۆيستىك قىزمەتكە بايلانىستى. كومپانيانىڭ ءوز فيليالى بار جانە ولار وسى ۆاگوندارعا قىزمەت كورسەتەدى. ءبىز «تالگو» ۆاگوندارىنا ەسكى پويىزدار سياقتى اعىتىپ، كۇردەلى جوندەۋ جاسامايمىز»، - دەدى قانات الماعامبەتوۆ يندۋستريا مينيسترلىگىنىڭ كەڭەيتىلگەن القا وتىرىسىنان كەيىن.

باسقارما ءتوراعاسى ورىنباسارىنىڭ ايتۋىنشا، پويىز بيلەتتەرىنىڭ قىمباتتىعى ۆاگوندارعا قىزمەت كورسەتۋ مەن ولاردى كۇتىپ ۇستاۋعا جۇمسالاتىن شىعىندارعا بايلانىستى. سونداي-اق، ول جىل سايىن باعا كوتەرىلىپ وتىراتىنىن اتاپ ءوتتى.

«جەكە تاسىمالداۋشىلار دا، «جولاۋشىلار تاسىمالى» دا 1- قاڭتاردان باستاپ بيلەت قۇنىن %7 عا كوتەردى»، - دەدى قانات الماعامبەتوۆ.

ەسكە سالايىق، بۇعان دەيىن سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆ ەلىمىزدەگى كوممەرتسيالىق پويىزدار بيلەتى قىمبات بولعانىمەن، شىعىندى ەكەنىن مالىمدەپ ەدى.